Qostanaılyq ónim zamanaýı suranysqa jaýap beredi - Frantsııa Elshisi
QOSTANAI. QazAqparat - Qostanaı oblysyna kelgen Frantsııanyń Qazaqstandaǵy Tótenshe jáne Ókiletti Elshisi Fılıpp Martıne óńirlik kásipkerler palatasynyń jıynyna qatysty, dep habarlaıdy QazAqparat tilshisi.
Fılıpp Martıneniń astyqty aımaqqa kelgendegi maqsaty -jergilikti kásipkerlik ortamen áriptestik baılanys ornatý, óńirdiń ekonomıkalyq áleýetimen tanysý. Ol osy oraıda «Atameken» óńirlik kásipkerler palatasynda bıznes ókilderimen kezdesti.
Basqosýda eki el arasyndaǵy saýda-ekonomıkalyq baılanysty nyǵaıtý máseleleri qozǵaldy. Taraptar óz usynystary men pikirlerin ortaǵa saldy.
Jalpy, aýyl sharýashylyǵy salasyna kelsek, búginde Frantsııaǵa elimizden tek zyǵyr tuqymdary eksporttalýda. Fılıpp Martıneniń sózinshe, Qostanaıdyń ózinde-aq, álemdik naryqqa shyǵatyn ónimder bar.
«Qazir Eýropa, sonyń ishinde tipti Frantsııa aýyl sharýashylyǵy salasynda daǵdarysty bastan ótkerýde. Sizderde ekologııalyq artyqshylyqtar bar, ónimderge túrli qospalar, GMO qoldanbaısyzdar. ıAǵnı, tabıǵı ónim óndirilip jatyr. Olar zamanaýı trendter men suranysqa jaýap beredi. Qazir organıkalyq taǵamdar keń taraı bastady. Meniń oıymsha, Frantsııada sizderdiń ónimderińizge qyzyǵýshylyq tanytatyn kásiporyndar tabylady», - dep atap ótti Elshi.
Kásipkerler palatasy dırektorynyń ekonomıkalyq máseleler boıynsha orynbasary Gennadıı Kýkoba qostanaılyq jáne frantsýz kásiporyndary agroónerkásiptik keshen, densaýlyq saqtaý, týrızm, jańartylatyn energetıka salalarynda ortaq tetik taba alatynyna toqtaldy.
«Bizdiń óńirde mal sharýashylyǵymen aınalysatyn kompanııa bar. Maldyń tezegin bıogaz óndirý úshin paıdalanady. Bizge Frantsııanyń qaldyqtardy óńdeý tájirıbesin bilý asa qyzyqty», - dep atap ótti Kýkoba.
Jıyn qorytyndysynda Elshige kásipkerlerge qyzmet kórsetý ortalyǵy tanystyryldy. Óńirlik palata bazasynda ornalasqan ortalyqtyń jumysymen tanysqan Fılıpp Martıne onyń ózektiligin alǵa tartty.
