Qostanaılyq oqýshylarǵa 12 myńnan astam kompıýter beriledi

QOSTANAI. QazAqparat – Qostanaı oblysyna 2479 kompıýterlik tehnıka jıyntyǵy jetkizildi. Bul týraly óńirlik kommýnıkatsııalar alańynda ótken brıfıngte oblystyq bilim basqarmasynyń basshysy Záýre Báımenova málim etti, dep habarlaıdy QazAqparat.

2020-2021 oqý jylynyń birinshi toqsany aıaqtalýǵa jaqyn. Oblys mektepterindegi oqý protsesi josparly rejımde júrgizilýde. Jalpy 494 mektepte 110 206 oqýshy bilim alady. Qazir sonyń ishinde 337 mektep shtattyq rejımde oqytýda. Oqýshylardy kompıýterlermen qamtamasyz etý máselesi keshendi túrde sheshilip keledi. 31 qazanǵa deıin taǵy 12 743 kompıýterlik tehnıka jıyntyǵyn kútemiz, atap aıtqanda 10691 noýtbýk jáne 2052 planshet jetkiziledi, olar oblystyń barlyq 20 óńiriniń mektepterine taratylady», - dedi basqarma basshysy.

Oqýshylar jyl saıyn beriletin materıaldyq kómekten qur qalmaıdy. QR Úkimetiniń qaýlysyna sáıkes arnaıy 5 sanattaǵy (AÁK alýǵa quqyǵy bar otbasylardan shyqqan balalar, AÁK almaıtyn, jan basyna shaqqandaǵy tabysy eń tómengi kúnkóris deńgeıiniń shamasynan tómen otbasylardan shyqqan balalar, jetim balalar, ata-anasynyń qamqorlyǵynsyz qalǵandar, TJ saldarynan shuǵyl járdemdi talap etetin otbasylardan shyqqandar) balalar tıisti kómegin alady.

«Oqýshylar men tárbıelenýshiler úshin materıaldyq jáne qarjylyq kómek usynylady.

Búgingi kúni bilim bólimderiniń derekteri boıynsha Jappaı Oqytý Qory 665,9 mln teńgeni quraıdy. Balalarǵa ystyq tamaq pen azyq-túlik sebetteri beriledi. Budan bólek kıimder, mektep quraldaryn, jańa jyldyq syılyqtar satyp alýdy josparlap otyrmyz», - deıdi Záýre Báımenova.

Basqarma basshysy aıtqandaı, aldaǵy jeltoqsan aıynda «ıÝbıleınyı» shaǵyn aýdanynda memlekettik jáne orys tilinde bilim beretin 1200 orynǵa arnalǵan jańa mektepti ashý josparǵa alyndy. Onyń qurylysyna 3,1 mlrd teńge bólingen. Osyǵan baılanysty 14 qazannan bastap oqýshylardy aldyn ala tirkeý bastaldy. Qazir jańa mektepke 580 oqýshy jazylǵan.