Qostanaılyq oqýshy álemdegi eń myqty matematıka bilgirleriniń qataryna endi
QOSTANAI. QazAqparat - Qostanaıdan kelgen oqýshy Jan Dáýitov Halyqaralyq matematıkalyq Olımpıadada «qola» medal jeńip aldy, dep habarlaıdy QazAqparat tilshisi Qostanaı oblysy Bilim basqarmasynyń baspasóz qyzmetine silteme jasap.
«2-13 shilde aralyǵynda Chıba qalasynda (Japonııa) 64-shi Halyqaralyq matematıkalyq olımpıada ótti. Olımpıada qorytyndysy boıynsha daryndy balalarǵa arnalǵan»Bilim-ınnovatsııa«mamandandyrylǵan lıtseı-ınternatynyń 10 synyp oqýshysy Jan Dáýitov qola medal jeńip aldy. Bul - Qostanaı oblysynyń tarıhynda 15 jylda alǵash ret bolǵan osyndaı mańyzdy jetistik. Lıtseıde jyldar boıy alǵan bilim óz jemisin berdi», - dep habarlady vedomstvodan.
Bul jas qostanaılyqtyń alǵashqy mańyzdy marapaty emes. Osy oqý jylynda Jan respýblıkalyq oqýshylar Olımpıadasynyń, geometrııa boıynsha Iran olımpıadasynyń, Halyqaralyq Azııa-Tynyq muhıty matematıkalyq olımpıadasynyń altyn medalin, «Jibek joly» halyqaralyq olımpıadasy jáne Halyqaralyq Jáýtikov olımpıadasynyń kúmis júldesin, Balqan matematıkalyq olımpıadasynyń qola medalin jeńip alǵan.
Janna Musabaeva
