Qostanaılyq oqýshy 16 jyl boıy týý týraly kýáliksiz júrgen
QOSTANAI. QazAqparat - Arqalyq qalalyq soty mektep oqýshysynyń týǵan kúni týraly derekti 16 jyl ótken soń anyqtady, dep habarlaıdy QazAqparat tilshisi.
Oblystyq sotta málim etilgendeı, qala turǵyny 2000 jyldyń 23 jeltoqsanynda týǵan. Oqýshynyń turǵylyqty jeri men týǵan kúnin anyqtaý úshin qalalyq bilim bólimi qyzmetkerleri sotqa aryz jazǵan.
«Qala turǵyny Tatıana P.-nyń týý týraly kýáligi bolmaǵan. Jeke tulǵany rastaıtyn qujat alý úshin onyń týǵan kúni anyqtaldy. Qyzdy apasy tárbıeleıdi, ol qaladaǵy mektepterdiń birinde bilim alady. Onyń turǵylyqty mekenjaıy áli belgisiz», - dep málim etildi oblystyq sotta.
Osylaısha, sot sheshimimen qalalyq bilim bólimi qyzmetkeriniń aryzy qanaǵattandyrylyp, zańdy mańyzy bar fakt anyqtaldy. Arqalyq qalasynyń turǵynyna 2000 jyly 23 jeltoqsanda týǵanyn rastaıtyn jeke qujat berildi.
