Qostanaılyq muǵalimderdiń jalaqysy 100 myń teńgege deıin ósti

QOSTANAI. QazAqparat - Bıyl Qostanaı oblysy muǵalimderiniń jalaqysyn kóterý úshin respýblıkalyq bıýdjetten 3 mlrd teńge bólindi. Bul týraly oblys ákiminiń orynbasary Marat Júndibaev aıtty, dep habarlaıdy QazAqparat tilshisi.

«Elbasynyń bıylǵy Joldaýynda sapaly bilim berýdiń mańyzdylyǵyn arttyrý jóninde keńinen toqtaldy. Osy maqsatta oblys bıýdjetiniń aýqymdy bóligi bilim salasyna jumsalyp keldi. Buǵan qosa qazirgi ýaqytta kadr daıyndaý isine kóńil aýdaryp otyrmyz. Ásirese, matematıkalyq baǵytta oqytatyn pedagogtarǵa suranys kóp»,- dedi  M. Júndibaev.

Onyń aıtýynsha, oblysta 14225 pedagog jumys isteıdi. Olardyń teń jartysynan kóbi arnaıy kýrstardan ótip, biliktiligin arttyrǵan.

«Búginde Elbasynyń tapsyrmasyna sáıkes, muǵalimderdiń materıaldyq jaǵdaıyn jasaý mindeti qoıylyp otyr. Osy baǵytta 2018 jylǵy 1 qańtardan bastap Qostanaı oblysy muǵalimderiniń eńbekaqysyn ósirý úshin respýblıkalyq bıýdjetten 3 mlrd teńge bólindi», - deıdi oblys ákiminiń orynbasary.

Osylaısha,  bıyl qostanaılyq muǵalimderdiń jalaqysy ortasha eseppen 100 myń teńgege deıin ósti.