Qostanaılyq messendjerde qarjy pıramıdasyn quryp, jurtty aldaǵan
PETROPAVL. QazAqparat – Soltústik Qazaqstan oblysynyń tártip saqshylary WhatsApp messendjerinde qarjy pıramıdasyn quryp, aýyl turǵynyn aldady degen kúdikpen Qostanaı qalasynyń turǵynyn ustady, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Aqqaıyń aýdanynyń 50 jastaǵy aýyl turǵyny ońaı jolmen aqsha tabamyn dep ınternet alaıaqtyń quryǵyna túsken. Internette habarlandyrýdy kórgen ol WhatsApp messendjerindegi topqa kirý úshin 500 teńge jarna tólegen. Uıymdastyrýshy ýádesinde turyp, ol aqshany eselep qaıtarǵan. Ońaı jolmen aqsha tappaq bolǵan áıel eki apta ishinde alaıaqqa 90 myń teńge jibergen. Onyń 30 myńy «tabys» retinde qaıtarylyp, qalǵan aqshasynan aıyrylyp qalǵan. Alaıaqtyń quryǵyna túskenin kesh túsingen áıel polıtsııaǵa júgindi.
Polıtseıler kúdiktini shilde aıynan izdedi. Tártip saqshylarynyń izine túsetinin sezgen kúdikti jasyrynýǵa tyrysqanymen, jedel ýákilder onyń júrgen jerin anyqtady. Polıtsııa kórshi oblystaǵy aýyldyń birinde Qostanaı qalasynyń 24 jastaǵy turǵyny ustaldy.
Atalǵan fakti Sotqa deıingi tergep-tekserýdiń biryńǵaı tizilimine «Alaıaqtyq» baby boıynsha engizildi. Kúdiktige qatysty mindetti kelý túrindegi májbúrleý sharasy taǵaıyndaldy. Qazirgi ýaqytta jábirlenýshige keltirilgen shyǵyn tolyǵymen óteldi. Polıtseıler kúdiktiniń osyndaı basqa qylmystarǵa qatysy bar-joǵyn tekserip jatyr.
«Krımınaldyq polıtsııa qyzmetkerleri habarlandyrý saıttaryna, áleýmettik jelige, aqparattyq keńistikke monıtorıng júrgizýdi kúsheıtti. Qazirgi ýaqytta oblysta kıberqylmysqa qarsy «Antifraud» is-sharasy ótkizilip jatyr. Іs-sharanyń eki kúninde quqyqqa qaıshy kontenti bar saıttarǵa 80 silteme anyqtaldy, siltemeler tıisti organdarǵa buǵattaý úshin joldandy. Aqparattyq tehnologııalar salasynda buryn jasalǵan 10 qylmys ashyldy, Sotqa deıingi tergep-tekserýdiń biryńǵaı tizilimine 3 anyqtalǵan qylmystyq quqyq buzýshylyq engizildi», - deıdi SQO PD krımınaldyq polıtsııa basqarmasynyń asa mańyzdy ister jónindegi aǵa jedel ýákili Vıtalıı Podchernın.
