Qostanaılyq memqyzmetshiler Shahanda zardap shekkenderge 11 mln teńgeden astam qarajat aýdardy

QOSTANAI. QazAqparat - Qaraǵandy oblysy Shahan kentinde úıdiń bóligi qulaǵan kezde zardap shekken otbasylarǵa kómek retinde Qostanaı oblysynyń memlekettik qyzmetshileri 11 mıllıon teńgeden astam qarajat jınady, dep habarlady «QazAqparat» HAA tilshisi.

Jınalǵan qarajat «Shahtınsk qalasy Shahan kentinde oryn alǵan tótenshe oqıǵa saldarynan zardap shekken tulǵalarǵa kómek qory» jeke qaıyrymdylyq qoryna aýdaryldy. Qarjy jınaýǵa jergilikti atqarýshy organdar qyzmetkerleri,  barlyq deńgeıdegi ákimder, oblystyq basqarmalar men vedomstvolyq baǵynysty mekemeler qyzmetkerleri qatysty.

Sońǵy derekke sáıkes jınalǵan qarjy 41 mln teńgeni quraǵan.

Qostanaı oblysy ákiminiń baspasóz qyzmetiniń jetekshisi Ásııa Aımaǵambetovanyń aıtýynsha, qazir óńirde barlyq jylytý kózderi tolyqtaı tekserilýde. Buǵan oblys ákimi bastamashylyq etti.

 «Jylytý maýsymy bastalarda barlyq jylýmen jabdyqtaý nysandary tekserilgenine qaramastan, oblys turǵyndarynyń qaýipsizdigin qamtamasyz etý úshin qosymsha sharalar qabyldaý qajet», - dep atap ótti óńir basshysy.

Áleýetti táýekelder anyqtalǵan jaǵdaıda olardy joıý sharalary qabyldanatyn bolady.

Eske salsaq, 1 qańtarda saǵat 22.40 mınýtta Shahan kentinde kóp qabatty úıdiń bóligi qulady. 9 adam qaza tapty, olardyń 3-eýi bala. Oqıǵa sebebin arnaıy komıssııa tekserýde. Aldyn ala derek boıynsha apat avtomatty jylý júıesiniń aqaýynan bolǵan.

Turǵyndar páterlerine oralýda. Sarapshylar úsh kireberisti jaramdy dep tanydy, jylý júıesi qalpyna keltirildi. Bul úshin modýldik qazandyq ornatyldy.