Qostanaılyq medıtsına nysandarynyń kredıtorlyq bereshegi 3,6 mlrd teńgeden asqan

QOSTANAI. QazAqparat – Qostanaı oblystyq densaýlyq saqtaý basqarmasy oblys ákimi Qumar Aqsaqalovqa medıtsınalyq uıymdardyń kredıtorlyq bereshegin óteý úshin qosymsha 728 mıllıon teńge bólýdi surap júgindi, dep habarlaıdy QazAqparat Kstnews.kz-ke silteme jasap.

Oblystyq densaýlyq saqtaý bıýdjeti ótken jylmen salystyrǵanda bıyl aıtarlyqtaı artyp, 105,4 mlrd teńgeni (2022 jyly – 86,3 mlrd teńge) quraǵanyna qaramastan, jetkiliksiz bolyp shyqty. Medıtsına qyzmetterine tarıf mólsheri densaýlyq uıymdarynyń naqty shyǵyndaryn ótemeıdi. Onyń ústine medıtsına mamandarynyń jalaqysyn barlyq sanattar boıynsha orta eseppen 24% kóterý týraly Úkimet qaýlysy bar. Al tarıfter jyl saıyn shamamen 11% ǵana ósedi.

Nátıjesinde kóptegen medıtsınalyq mekemelerde barlyq qarjylandyrý kóleminiń 80-90% eńbekaqy tóleý qoryna jumsalady. Kommýnaldyq qyzmetterge, dári-dármekterdi, medıtsınalyq jabdyqtardy, shyǵyn materıaldaryn satyp alýǵa qarajat qalmaıdy. Sonymen qatar densaýlyq saqtaý tarıfterinde ınflıatsııanyń joǵarylaýy eskerilmeıdi.

«Medıtsına uıymdarynyń júıeli túrde qarjylandyrylmaýy kredıtorlyq bereshektiń artýyna ákep soqty»,- deıdi oblystyq Densaýlyq saqtaý basqarmasynyń basshysy Danııar Jandaev.

Jalpy, óńirde medıtsına uıymdarynyń kredıtorlyq bereshegi aǵymdaǵy jyldyń 1 shildesine 3,6 mlrd teńgeni quraıdy.