Qostanaılyq maman Eýropa chempıonatynda tórelik jasaıdy
QOSTANAI. QazAqparat - FIFA tóreshisiniń kómekshisi, qostanaılyq Elena Alıstratova 2018 jylǵy Eýropa chempıonatynyń matchtaryna tórelik etedi, dep habarlaıdy QazAqparat Qazaqstan fýtbol federatsııasynyń baspasóz qyzmetine silteme jasap.
Elena Alıstratova 17 jasqa deıingi qyzdar arasynda Eýropa chempıonatynyń fınaldyq kezeńiniń matchtarynda jumys isteıdi. Al fınaldyq kezeń 9-21 mamyr aralyǵynda Lıtvada ótedi. Aıta keteıik, toptyq oıyndardyń nátıjesi boıynsha sheshýshi básekege Germanııa, Ispanııa, Polsha, Anglııa, Gollandııa, Fınlıandııa jáne Italııa joldama aldy. Lıtva quramasy alań qojaıyny retinde qatysady.
Sonymen qatar, bul týrnırde Ýrýgvaıda ótetin 17 jasqa deıingi qyzdar arasynda 2018 jylǵy Álem chempıonatyna qatysatyndar irikteledi.
