Qostanaılyq qyzǵa ota jasalyp kózindegi oq alyndy
ASTANA. QazAqparat - Qostanaıda oq tıgen qyzǵa ota jasalyp, kózine turyp qalǵan oq alynyp tastaldy, dep jazady alau.kz .
Jaraqat alǵan qyzdyń anasy Elena Serdechnaıa qazir ekeýi Máskeýde ekendigin jetkizgen. Balanyń basyndaǵy oqty alyp tastaý úshin ota jasalynǵan. «Oq tottana bastaǵan, qyzymnyń aýrýy kúsheıe tústi, oǵan aýyrsyndyrmaıtyn ekpeler kómektese almady. Ony alyp tastaý jóninde sheshim qabyldandy, ota 26 shildede jasaldy, qyzym 6 saǵat rentgen baqylaýymen operatsııa ústelinde jatty. Oq kózge kirip, sonda qalyp qoıǵan. Dıametri 5 mıllımetr áldebir metaldan quıylǵan oq alynyp tastaldy», - deıdi Elena Serdechnaıa.
Olar birneshe kúnnen keıin Qostanaıǵa qaıtyp oralady.
Eske sala ketsek, 18 jastaǵy Arzýl Gadjıev 2016 jyly 4 shildede 13 jasar qyzdyń kózinen atqan dep aıyptalýda . Oqıǵa Qostanaı qalasynda Altynsarın kóshesiniń boıyndaǵy salynyp bitpegen eki qabatty qurylystyń ishinde bolǵan. Jigit oqıǵa ornynan qashyp ketken. Ol Reseıdiń Chelıabınsk qalasynda ustalyp, Qostanaıǵa jetkizildi. Qazir qylmystyq is sotqa joldandy.
