Qostanaılyq qutqarýshylar shomylý maýsymyna daıyn

Departament bastyǵy Talǵat Kákimov jýrnalıstermen kezdesý barysynda tótenshe jaǵdaılardyń aldyn alý sharalarymen tanystyrdy. Onyń málimetinshe, ótken jyly oblysta on alty adam sýǵa batyp ketken, onyń ishinde altaýy - bala. Mamandardyń sózinshe, sýda qaýipsizdik erejelerin óreskel buzý, jabdyqtalmaǵan jerlerde shomylý jáne balalardyń sý aıdynyna jaqyn jerde eresekterdiń qaraýynsyz qalýy qaıǵyly jaıttarǵa ushyratady.
«Sý aıdyndarynda adamdardyń qaýipsizdigin qamtamasyz etý boıynsha is-sharalar jobasyn ázirledik. Atap aıtqanda, kópshilik demalatyn oryndarda qutqarý beketterin, medıtsınalyq kómek bólmesin
uıymdastyrý jumystary júrgizildi. Sondaı-aq ishki ister qyzmetkerlerimen birlesken aldyn alý sharalary men patrýldeý ótkizý kózdelgen»,- dedi Talǵat Kákimov.
Búgingi tańda oblysta resmı jabdyqtalǵan 5 jaǵajaı bar. Olar: Jitiqara qalasyndaǵy qalalyq jaǵajaı, Altynsarın aýdanyndaǵy «Jaılaý KZ» JShS demalys bazasy, «Selena» JShS demalys bazasy, «Sosnovyı bor» demalys orny, M. B. Shaıahmetov atyndaǵy «Svetofor» demalys aılaǵy.
«Qalǵan jaǵajaılarda sýǵa shomylý qaýipti sanalady. Sýǵa shomylý maýsymy kezeńinde sý aıdyndarynda tótenshe jaǵdaılardy boldyrmaý úshin qala-aýdandardyń ákimderine hat jiberdik. Olar qaýipsiz, normatıvtik talaptarǵa sáıkes keletin sýǵa túsýge arnalǵan oryndardy uıymdastyrýy tıis. Alaıda, jergilikti atqarýshy organdardyń kópshiligi osy máseleni sheshýge beıjaı qaraıdy. Sonyń kesirinen qaıǵyly jaǵdaılardy habarlaýǵa májbúrmiz. Bul durys emes», - deıdi departament basshysy.
Sonymen qatar jergilikti atqarýshy organdar turǵyndardyń ishinen qoǵamdyq qutqarýshylardy daıyndaý boıynsha jumys júrgizýi tıis. Degenmen, Talǵat Kákimov aıtqandaı, bul sharýa da aqsap tur.
«Qazirgi ýaqytta sý aıdyndaryndaǵy tótenshe jaǵdaılarǵa jedel áreket etý jáne osy jyldyń shomylý maýsymy kezeńinde shuǵyl rejımde jumys isteý úshin departamenttiń kúshteri men quraldary daıyndyqqa keltirildi. 7 birlik avtokólik jáne qutqarý tehnıkasy, 12 birlik júzý quraldary, súńgýir jabdyqtary daıyndaldy, janar-jaǵar maı jáne azyq-túlik qory quryldy»,- dep túsindirdi ol.