Qostanaılyq qutqarýshylar ózendegi muzdardy motorly aramen kesti
QOSTANAI. QazAqparat - Qostanaılyq qutqarýshylar Toquzaq ózenindegi muzdy motorly aranyń kómegimen kesti, dep habarlaıdy «QazAqparat» HAA tilshisi.
Soltústik óńirlik aeroutqyr jedel-qutqarý jasaǵynyń (SÓAJQJ) qyzmetkerleri Reseıdiń Chelıabi oblysymen shekaralas Qarabalyq aýdany Prırechnoe aýylynyń mańyndaǵy muzdardy kesti. Bul jumystar bes adamnyń kómegimen atqaryldy, sebebi shekaralas aýmaqta jáne beıtarap beldeýde jarylys jasaýǵa bolmaıdy.
SÓAJQJ basshysynyń orynbasary Sergeı Shmıdtiń aıtýynsha, muzdardy kesý arqyly «keptelýdiń aldyn alyp, sý tasqyny bolǵan kezde sý deńgeıiniń shamadan tys kóterilýine múmkindik bermeıdi».
Prırechnoe aýyly Qarabalyq aýdanynyń ortalyǵynan 80 shaqyrym jáne oblys ortalyǵy - Qostanaı qalasynan 220 shaqyrym qashyqtyqta ornalasqan. Prırechnoe aýyly kiretin Órnek aýyldyq okrýgi Toquzaq ózeniniń jaǵalaýyna jaqyn mańda boı kóterip, RF Chelıabi oblysymen shekaralasady.
