Qostanaılyq qutqarýshylar ıirimge tap bolǵan er adamdy aman alyp qaldy
QOSTANAI. QazAqparat - Qostanaı qalasyndaǵy Gagarın bógeti tańǵaldyrýyn qoıar emes. 24 shilde kúni Soltústik óńirlik aeromobıldik jedel-qutqarý jasaǵy kezekti reıd sharalaryn júrgizý barysynda 44 jastaǵy er adamdy qutqaryp qaldy.
Oqys oqıǵa shomylýǵa tyıym salynǵan jerlerdi patrýldeý kezinde bolǵan. Sol kúni Tobyl ózeniniń jaǵasynda dostarymen birge demalyp jatqan er adam sergip qaıtý úshin sýǵa túsken. Ol jaǵadan alys jerge júzip ketip, sý ıirimine túsip qalǵan. Óz betimen shyǵa almaǵandyqtan, kómek surap, dabyl qaqqan. Er adamnyń daýsyn oǵan jaqyn jerde turǵan dosy estip, sońynan sýǵa túsken. Alaıda qutqarýǵa attanǵan azamat shamasy jetpeıtinin túsinip, jaǵaǵa qaıta oralǵan.
Sýǵa kete jazdaǵan er adamnyń kómek surap, aıǵaılaǵan daýysyn Ádilbek Oljas pen Damır Bektemisov esimdi qutqarýshylar estip, sýǵa sekirgen. Bólimshe basshysy daýys zoraıtqysh qurylǵy arqyly sýdaǵy er adamǵa kómek kele jatqanyn habarlap jetkizip, qutqarýǵa attanǵan dosynan jaǵaǵa qaıtýyn ótingen.
Qutqarýshylar batyp bara jatqan adamnyń janyna jete salyp, jyldam qutqarý jıletin kıgizip, qutqarý sheńberin bergen. Olar zardap shekken er adamdy jaǵaǵa jetkizip, tıisti kómek kórsetti. Sondaı-aq, sýda qaýipsizdik sharalaryn saqtaý jóninde profılaktıkalyq áńgime júrgizgen.
