Qostanaılyq qutqarýshylar boranda naýqastardy tasymaldaýǵa kómektesýde

QOSTANAI. QazAqparat – Qostanaı oblysynyń qutqarýshylary medıtsınalyq kómekke muqtaj jandardy jedel túrde jaqyn jerdegi aýrýhanalarǵa jetkizip jatyr, dep habarlaıdy QazAqparat tilshisi.

Qostanaı oblysynda aýa raıynyń nasharlaýy men jaıaý burqasyn qutqarýshylardyń jumysyn kóbeıte tústi. Keshegi kúnniń ózinde olar 7 tehnıkany kúrtik qardan shyǵaryp, 5 adamdy qaýipsiz jerge jetkizdi, 19 adamdy qutqardy. Olardyń arasynda bir bala bar.

«11 naýryzda Arqalyqqa jaqyn Fýrmanovka aýylynyń turǵyndary qar qursaýynda qalyp qoıdy. Qar basý men qatty jeldiń áserinen aýylǵa jeter jol jabylyp qaldy, - dep málimdedi TJD. – 11:36-da aýyl turǵyndary qutqarýshylarmen baılanysqan. 5 adam medıtsınalyq kómekke muqtaj bolǵan. Olardy jedel túrde Arqalyqtyń ortalyq aýdandyq aýrýhanasyna jetkizý kerek boldy. Joldy tizege deıin qalyń qar basqan. 14:20-da aýylǵa jol talǵamaıtyn kólikpen jetken TJD qyzmetkerleri tórt eresek adamdy jáne bir úsh jasar balany qar qursaýynan alyp shyǵyp, Arqalyqtaǵy aýrýhana dárigerlerine tapsyrdy.

«Mundaı kúnderi qutqarýshylar jedel járdem qyzmetkerleriniń jumysyn jeńildetip, kómek kórsetýde. Olar azamattardan túsken qońyraýlarǵa shuǵyl jaýap berip otyrady, habarlasqandar kóbinese shalǵaı aýyldardyń turǵyndary bolyp shyǵady. Zardap shekkenderge kómek kórsetilip, olar medıtsınalyq mekemelerge jetkiziledi. Aýa raıynyń qolaısyzdyǵyna qaramastan qutqarýshylar on, keıde júz shaqyrym jerdi basyp ótip, adamdarǵa kómek kórsetip jatyr», - dep qosty vedomstvoda.