Qostanaılyq qutqarýshylar bir táýlikte 17 adamdy qar qursaýynan shyǵardy

QOSTANAI. QazAqparat – Keshe, 25 naýryzda Ashýtasty aýylynyń turǵyndaryn shuǵyl medıtsınalyq kómek kórsetý úshin Arqalyq qalasynyń aýrýhanasyna tasymaldaýda qutqarýshylardyń kómegi qajet bolǵan, dep habarlaıdy QazAqparat óńirlik TJD baspasóz qyzmetine silteme jasap.

1977 jyly týǵan er adamnyń aıaǵy synǵan, al 1974 jyly týǵan azamatty ıt qapqan. Sondaı-aq jol boıynda qar qursaýynda qalyp qoıǵan 3 jeńil avtokólikten 11 adam, onyń ishinde 2 bala qutqaryldy. SKB-600 jol talǵamaıtyn kóligimen 30 shaqyrym joldy eńserip, saǵat 18:35-te JQB qyzmetkerleri azamattardy Arqalyqqa aman-esen jetkizdi.

26 naýryzǵa qaraǵan túni Áýlıekól aýdanynda olar 1998 jyly týǵan júkti áıeldi Turǵymbaev aýylynan evakýatsııalap, ony Áýlıekól aýylyndaǵy aýrýhanaǵa jetkizý úshin jergilikti atqarýshy organdarǵa tapsyrdy. Bul úshin qutqarýshylarǵa 100 shaqyrymǵa jýyq júrip ótý múmkindigi joǵary «TREKOL» tehnıkasyn paıdalanýǵa týra keldi.

Ótken túnde Alýa aýylynyń janyndaǵy Arqalyqtan 80 shaqyrym jerdegi aýdandyq mańyzy bar avtojolda taǵy bir qutqarý operatsııasyn JQB qyzmetkerleri júrgizdi. Olar mingen jeńil kólik qar qursaýynda qalǵan. Qutqarýshylar 6 adamdy onyń ishinde 2 balany UQK-600-ge otyrǵyzyp, saǵat 01:35-te Arqalyq qalasyna jetkizdi.