Qostanaılyq kýrs jumysyn satyp alý úshin Qiwi ámııanymen aqsha aýdarǵan
Departamentte málim etkendeı, 2018 jylǵy 7 aı ishinde Qostanaı oblysy aýmaǵynda alaıaqtyq deńgeıi 514-ten 683-ke nemese 32,9 paıyzǵa ósken.
«Alaıaqtyqqa qatysty 683 oqıǵa tirkelse, sonyń 145-i ǵalamtorda jasalǵan. Olardyń qatarynda OLX, Kolesa.kz, Krysha.kz saıttary, Instagram jelisi, tólem termınaldary bar. Mysaly, Qiwi ámııany arqyly qyzmet nemese taýar úshin tólem júrgizý maqsatynda aqsha aýdarǵan azamattardyń qarajatyn ıemdený boıynsha 38 derek tirkelgen», - dedi ІІD ókili.
Osylaısha, 2018 jylǵy 13 aqpanda qostanaılyq stýdent ǵalamtordaǵy saıttardyń birinen 8 400 teńgege kýrstyq jumys jasaıtyn qyzmet túrin tapqan. Habarlandyrýda aqshany Qiwi ámııany arqyly belgili bir shotqa jiberý kerek delingen. Jigit qarajatty aýdarǵan soń, alaıaqtardyń qurbany bolǵanyn túsingen. Dál qazir Qostanaı oblysynyń ІІB atalmysh derek boıynsha tergeý amaldaryn júrgizip jatyr.
«Mundaı oqıǵalar jıi qaıtalanyp jatady. Oblys boıynsha alaıaqtyqtan jalpy 624 adam zardap shekken, olardyń 320-sy - áıel adamdar, zeınetkerler - 56, kámelet jasqa tolmaǵandar - 4, kolledj stýdentteri - 3, joǵary oqý ornynyń stýdentteri - 2. Sondaı-aq, alaıaqtardyń quryǵyna túskenderdiń qatarynda múmkindigi shekteýli bir azamat bar», - dedi vedomstvo ókili.
