Qostanaılyq kásipkerlerdi qarjylandyrýǵa 3,1 mlrd teńge bólindi
QOSTANAI. QazAqparat - Bıyl oblysta nátıjeli jumyspen qamtý baǵdarlamasynyń ekinshi baǵytyn júzege asyrýǵa 3,1 mlrd teńge qarajat bólindi. Bul týraly oblys ákimdiginde ótken jıynda oblystyq aýyl sharýashylyǵy basqarmasynyń basshysy Darhan Ábdikárimov málim etti, dep habarlaıdy QazAqparat.
«Aýyldar men shaǵyn qalalardy nátıjeli jumyspen qamtý baǵdarlamasynyń ekinshi baǵytyn júzege asyrýǵa bıyl oblysymyzǵa 3,1 mlrd teńge nesıe qarajaty kelip tústi. Bul somany 217 adamǵa nesıelep berý josparlanyp otyr. Atalǵan qarjy barlyq aýdandarǵa teń bólinip beriledi. Al aldaǵy mamyr aıynda qosymsha taǵy 1 mlrd teńge kelip túspek», - dedi Darhan Ábdikárimov.
Basqarma basshysynyń dereginshe, bıyl «Bastaý Bıznes» jobasy boıynsha 1,5 myńnan astam adamdy oqytyp, 415 adamdy nesıeleý josparlanǵan. Baǵdarlama shartyna sáıkes nesıe aýdandar men shaǵyn qalalarǵa beıim jobalarǵa beriledi. Máselen, byltyr nátıjeli jumyspen qamtý baǵdarlamasy boıynsha berilgen nesıeniń 80% mal sharýashylyǵyna tıesili.
Oblys basshysy Arhımed Muhambetov «Bastaý Bıznes» jobasy boıynsha oqytylatyn adamdarǵa nesıe berý joldaryn qaıta qarastyrý kerektigin aıtty. Ár óńir úshin ózine tıesili kásibi bolý kerektigin basa aıtyp, mamandardyń bıznes ıdeıa jaǵyna sylbyr ekenin synǵa aldy.
«Eger qarajatpen qamtı almasaq, turǵyndardy ne úshin oqytyp jatyrmyz? Ár aýdan, shaǵyn qalalarǵa beıim qandaı kásip bolý kerek, sony búkteme qaǵazǵa máselen «100 ıdeıa» nemese «50 ıdeıa», «30 ıdeıa» dep usynys jasasańyzdar, durys bolar edi. Bir aýdan et óndirýge, bir óńir dońyz, endi biri qoıan, taǵy bireýi kókónis ósirýge qolaıly. Osyǵan mán berińizder», - dedi A.Muhambetov.
Aımaq basshysy tıisti basqarmalarǵa kásipkerlerdi oqytý boıynsha elimizdiń basqa oblystary men Reseı eliniń tájirıbesin qaraýdy tapsyrdy.
