Qostanaılyq kásipkerler bir jylda 3,6 mlrd teńge nesıe alǵan
QOSTANAI. QazAqparat - 2018 jyly Qostanaıda 933 shaǵyn nesıe berildi. Bul týrady oblys ákimdiginde ótken apparat májilisinde oblystyq Aýyl sharýashylyǵy jáne jer qatynastary basqarmasynyń basshysy Jansultan Táýkenov aıtty, dep habarlaıdy QazAqparat tilshisi.
«Eńbek» nátıjeli jumyspen qamtýdy jáne jappaı kásipkerlikti damytýdyń 2017 - 2021 jyldarǵa arnalǵan baǵdarlamasy» aıasynda byltyr Qostanaı oblysynda 3,6 mlrd teńge qarjy bólingen. Buǵan qosa, «Prezıdenttiń bes áleýmettik bastamasy» sheńberinde shaǵyn nesıeleý úshin qosymsha 1 mlrd teńge qarastyryldy.
«Atalǵan soma qarjy ınstıtýttary arasynda bólindi, atap aıtqanda, «Aýyl sharýashylyǵyn qarjylaı qoldaý qory» AQ-ǵa - 2,1 mlrd teńge, Agrarlyq kredıttik korporatsııasyna - 1,5 mlrd teńge. Bul qarjy tolyǵymen ıgerildi. Barlyǵy 933 shaǵyn nesıe berildi. Baǵdarlamaǵa Arqalyq qalasy, Qostanaı, Amangeldi, Fedorov jáne Áýlıekól aýdandary belsene qatysty. Taran, Uzynkól, Qarabalyq jáne Qamysty aýdandary jospardy tolyqtaı oryndaǵan joq», - dedi Jansultan Táýkenov.
Byltyr 778 startap joba iske asty. Nátıjesinde 939 turaqty jumys orny ashyldy. Shaǵyn nesıeleý baǵdarlamasy aıasynda 2,1 myń iri-qara mal, 1,3 myń jylqy satyp alyndy. Basqarma basshysynyń sózinshe, basqa da kásip ashqandarǵa qoldaý bar. Ásirese, shalǵaı aýyldarǵa qonaqúıler, janar-jaǵarmaı beketterin salýshylar kóbeıgen.
«2019 jylǵa arnalǵan josparly ındıkatıvter belgilendi. Nátıjesinde bıznestiń 65 salasy boıynsha shaǵyn nesıe beriledi. Bul aýyl turǵyndary úshin qosymsha kásip kózderin (kólik, TQS, qurylys, tamaqtaný, týrızmdi damytý) ashýǵa múmkindik beredi», - deıdi Jansultan Táýkenov.
