Qostanaılyq kásipkerler aýyl klýbyn jańartý úshin 14 mln teńge jınady
QOSTANAI. QazAqparat - Qostanaı oblysyndaǵy Amangeldi aýdanyna qarasty Esir selolyq okrýginde aýyldyq klýb paıdalanylýǵa berildi, dep habarlaıdy QazAqparat tilshisi.
Amangeldi aýdandyq mádenıet úıiniń jetekshisi Saǵynǵalı Seıdınniń sózinshe, aýyldyq klýb «Rýhanı jańǵyrý» baǵdarlamasynyń «Áleýmettik bastamalar kartasy» baǵyty boıynsha qaıta ashylyp otyr.
«Turǵyndar aýyldyq klýbtyń ashylýyn kópten kútti. Endi mádenı-buqaralyq is-sharalar, kontsertter men qoıylymdardy ótkizý úshin aýdan ortalyǵyna baryp, shyǵyndalýdyń qajeti joq. Turǵyndardy qýanyshqa bólegen jergilikti kásipkerlerge rızamyz. Atalǵan nysan 7 jyl boıy bos turdy. Kásipkerler óz qaltalarynan 14 mln teńge jınap, eski ǵımaratty qaıta jańǵyrtty. Aldaǵy ýaqytta osyndaı eski qurylys oryndaryn jańa keıipke endirip, mádenıet úılerin ashý josparda bar», - deıdi S.Seıdın.
Ázirge, aýyldyq klýbta 4 turaqty jumys orny ashyldy. Sondaı-aq, klýb ishinde kitaphana ornalasqan.
«Negizinen, mádenı is-sharalar kezinde mekteppen tyǵyz jumys isteımiz. Aýylda ónerli jastar jeterlik. Al, mundaı mádenı nysandar adamdardyń bos ýaqytyn durys paıdalanýyna múmkindik jasaıdy», - dedi mádenıet úıiniń dırektory Nursultan Muhtarov. 
Belgili bolǵandaı, mádenıet nysanyna jıHaz satyp alý úshin jergilikti bıýdjetten 1,7 mln teńge qarjy bólingen. Buǵan qosa aýdandaǵy barlyq aýyldyq klýbty jańartý jumystary qolǵa alynbaq.
