Qostanaılyq kásipkerler 600 mlrd teńgeniń ónimin óndirdi
QOSTANAI. QazAqparat - Qostanaıda shaǵyn jáne orta bıznes ónimderi sońǵy 4 jylda 50 paıyzǵa ósken. Bul týraly oblys ákimdiginde ótken jıynda aıtyldy, dep habarlaıdy «QazAqparat» tilshisi.
Shaǵyn jáne orta bıznes (ShOB) sýbektilerin jan-jaqty qoldaý - el ekonomıkasyn damytýdyń bir baǵyty ekeni sózsiz. Bul baǵyt Qostanaı oblysynda da qarqyndy júzege asyp keledi. Máselen, sońǵy 4 jylda atalǵan bıznestiń ónimi 50 paıyzǵa ósken.
«Shaǵyn jáne orta bıznes sýbektileriniń jumys belsendiligi boıynsha bizdiń oblys respýblıkada 7-orynda keledi. Kórsetkishterimiz byltyr edáýir jaqsardy. 2014 jyly 138 myń adam shaǵyn bızneske jumyldyrylsa, bıyl 152 myń adam ózderiniń jeke kásibin dóńgelentip otyr. 2018 jyly oblystyń ShOB damytýǵa 6 mlrd teńge qarastyryldy. Sonyń 1,5 mlrd teńgesi shaǵyn nesıeleýge bólindi», - deıdi oblystyq kásipkerlik jáne ındýstrıaldy-ınnovatsııalyq damý basqarmasynyń basshysy Isa Qudabekov.
Basqarma basshysynyń sózinshe, 2013 jyldan bastap memlekettik jáne aımaqtyq baǵdarlamalarǵa qatysqan kásipkerlerge 7,3 mlrd teńge sýbsıdııa bólingen. Barlyǵy 5 myńǵa jýyq turaqty jumys orny ashyldy. Búginge deıin 589,3 mlrd teńgeniń ónimi óndirildi.
«Bıznestiń jol kartasy-2020» baǵdarlamasynyń júzege asyrylýyna osy jyly 2,2 mlrd teńge qarastyryp otyrmyz. Qazirdiń ózinde 79 bıznes joba maquldandy. Sýbsıdııa qarjysynyń kóbi óndiris (31%) jáne aýyl sharýashylyǵy (18%) salalaryna baǵyttaldy. Buǵan qosa «Eńbek» jappaı kásipkerlik baǵdarlamasynyń oryndalýyna 3,8 mlrd teńge qarjy quıý kózdeledi. Onyń 1,5 mlrd teńgesi Prezıdenttiń «Bes áleýmettik bastamasy» aıasynda iske asyrylady», - dedi Isa Qudabekov.
Oblys ákimi memlekettik baǵdarlamalardy josparly oryndamaı jatqan aýdan-qalalardyń ákimderine syn aıtty. Ásirese, Lısakov, Arqalyq qalalary men Altynsarın, Amangeldi, Jankeldın, Jitiqara, Uzynkól aýdandarynda kásipkerlerdiń jumysy baıaý júrip jatyr.
