Qostanaılyq kásipker qaldyqtardy kádege jaratýda
QOSTANAI. QazAQPARAT - Qostanaılyq kásiporyndardyń biri qaldyqtardy kádege jaratyp, jańa tabys kózin tapqan. Anyǵyn aıtqanda, plastık bótelke qaldyqtaryn óńdep, geotekstıl men geotor óndirýmen aınalysady. Bul kásiporynnyń qysqa merzim ishinde elimizdiń úzdik óndiris oryndarynyń qataryna qalaı engendigin jáne naryqty qalaı baǵyndyrǵanyn kásiporyn dırektory Marat Sádýaqasov aıtyp berdi, dep habarlaıdy QazAqparat tilshisi.
Nebári birneshe jyldyń ishinde jergilikti «S.M.F. - System» kompanııasy qazaqstandyq naryqty jaýlap alyp, ótken jyly «Altyn sapa» konkýrs-kórmesinde «Óndiristik maqsattaǵy úzdik taýar» nomınatsııasyn jeńip aldy. Bul jeńistiń qupııasy qarapaıym.
Birinshiden, Marat Sádýaqasovtyń kásiporny qaldyqty kádege jaratatyn - naǵyz «jasyl» óndiris orny. Ekinshiden, kompanııa qurylǵanyna kóp bolmasa da, qazaqstandyq naryqty jyldam jaýlap alǵan.
Kásiporyn dırektorynyń aıtýynsha, bári kıimniń ishkiligin ázirleýden bastalypty. Kásipker qytaılyq jáne reseılik óndiris oryndarynyń joǵary básekelestigine qaramastan, qysqa merzim ishinde elimizdegi holofaıber men sınteponǵa degen 90 paıyz qajettilikti ótegen.
Jylytqyshtar arqyly tabys tapqannan keıin kásipker avtojol qurylysynda paıdalanatyn geotekstıl men geotorlama óndirýdi qolǵa alǵan. M.Sádýaqasovtyń aıtýynsha, joldyń negizin nyǵaıtatyn jáne ony sýdyń shaıyp ketýinen qorǵaıtyn zamanaýı materıal qarapaıym ǵana plastıkalyq bótelkeden jasalady.
Marat Sádýaqasovtyń endigi jospary - qubyrlar jasap shyǵarý. Tipti, ol úshin qajetti qural-jabdyqtar satyp alynyp qoıylǵan.
«Eńbegimniń respýblıkalyq deńgeıde elenýi meni qatty qýantty. «Qazaqstannyń úzdik taýary» baıqaýynyń jeńimpazy atanǵan soń, maǵan tutynýshylarmen baılanys ornatý jeńildeı tústi. Bul bedeldiń belgisi dep bilemin. Tutynýshylar da marapat alǵan kásiporynnyń tegin emestigin baıqap otyr», - dep atap ótti kásipker.
Marat Sádýaqasovtyń aıtýynsha, óndiris orny baıqaýǵa taǵy da qatysýǵa úmitti.
