Qostanaılyq qarııa bótelkeden salǵan úıinde turyp jatyr
QOSTANAI. QazAqparat - Lımannoe aýylynyń turǵyny Vladımır Avhımovıch bótelkeden salǵan úıinde turyp jatyr, dep habarlaıdy QazAqparat tilshisi.
Vladımır Avhımovıch turyp jatqan qamys úı ótken ǵasyrdyń jetpisinshi jyldarynda salynǵan eken. Qabyrǵalary ábden toza bastaǵan soń ol bótelkelerdiń kómegimen jańartýǵa bel býypty.
«Bastapqyda júreksindim, kúz aıy bolatyn. Ne kerek, qys túskenshe aıaqtap úlgerdim. Negizi men sııaqty úı salyp alǵandar týraly teledıdardan kórgenmin. Jubaıymmen aqyldasa kele, biz de osy sharýaǵa kirisip kettik. Shyǵyn óte az boldy», - dep eske alady úı ıesi.
Avhımovıch atalǵan qurylysqa qajetti bótelkelerdiń ózin jarty jyldaı jınaǵan. Bala kezden beri shashylyp jatqan temir-tersek, qaǵaz qaldyqtaryn, qoqystardy jınaýǵa áýes bolypty. «Áıteýir, bir keregi bolatynyn biletinmin», deıdi ol.
Úıdiń úsh qabyrǵasy bos bótelkeden qalanyp, arasy balshyqpen sylanǵan. Mundaı shyny qabyrǵalar jaýynǵa mújilmeıdi, tipti aıazdarda synbaǵan.
«Bastysy, úıdiń jylýy ǵoı. Eger taǵy da bos shólmekter jınasam, basseın, fontan qabyrǵalaryn qalaýǵa bolady. Haýyzǵa sý toltyrǵanda jaryqpen shaǵylysyp tamasha kórinedi. Biraq bul úshin azdaǵan qarapaıym qurylys tehnologııasynan habardar bolǵan jón jáne bos shısha qaýipti bolǵandyqtan muqııat qaraý kerek», - dep keńes berdi Vladımır Avhımovıch.
