Qostanaılyq qarııa blokpostaǵy polıtseılerge kúnde tamaq aparady
QOSTANAI. QazAqparat – Qostanaı oblysynyń 70 jastaǵy turǵyny blokposttaǵy qyzmetkerlerge kúnde tamaq aparady, dep habarlaıdy QazAqparat.
70 jastaǵy Qamaı Qaparov Jangeldın aýdanyna qarasty Toqanaı aýylynda turady. Ol kún saıyn aýylynan 90 shaqyrym qashyqta ornalasqan blokpostqa barady. Maqsaty – sondaǵy polıtseılerge, medıtsına qyzmetkerlerine tamaq jetkizý.
«Karantın ýaqytynda eshkimge ońaı tıip otyrǵan joq. Ásirese, tańnan keshke deıin beketterde qyzmette turǵan polıtseılerdiń eńbegi ólsheýsiz. Qıyn shaqta olarǵa qoldan kelgenshe kómek berýimiz qajet. Kúnde tańerteń «Jıgýlıime» minip alyp, Toqanaıda 90 shaqyrymda jatqan blokpostqa baramyn. Munymdy bireý maqtasyn, jaqsy ataq alaıyn degen oımen jasamaımyn. Óıtkeni ózimniń ulym da quqyq qorǵaý salasynda jumys isteıdi. Sondyqtan polıtseılerdiń qyzmetin jaqsy túsinemin», - dedi qarııa agenttik tilshisine.
Qamaı aqsaqal blokpostqa kóbine sútten jasalǵan taǵamdar, et pen baýyrsaq aparady. Azyq-túlik jetkizýge zaıyby Aısha apamyz da kómektesedi. Zeınetkerdiń nemeresi Farhad Qaparov Arqalyq qalasy polıtsııa basqarmasynda jedel ýákil bolyp qyzmet etedi. Onyń áriptesteri atasynyń eńbegin joǵary baǵalady.
«Blokpostqa birqatar kólik keledi. Alaıda Qamaı atanyń kóligin birden baıqaımyz. Densaýlyqqa paıdaly taǵamdar ákeledi. Qýanyp qalamyz. Ol kisiniń kómegine rızamyz. Eńbegin esh umytpaımyz!», - dedi ýchaskelik polıtsııa ınspektory, polıtsııa aǵa leıtenanty Oljas Ábenov.
Oblystyq Polıtsııa departamenti baspasóz qyzmetiniń málimetinshe, Tótenshe jaǵdaılar rejımi kezinde oblys turǵyndary blokposttardaǵy tártip saqshylaryna únemi kómek qolyn sozyp turady. Osy ýaqytqa deıin 15 qaıyrymdylyq sharasy ótken.
