Qostanaılyq HQKO mamany eki balany órtten qutqaryp qaldy
QOSTANAI. QazAqparat - Qostanaı qalasynda janyp jatqan páterden eki balany qutqarǵan Aıdar Mustafın mamandandyrylǵan HQKO bóliminde jumys isteıdi, dep habarlaıdy QazAqparat.
Buǵan deıin habarlaǵanymyzdaı, 21 tamyz kúni Qostanaıda otbasylyq jataqhana órtenip, 2 bala qutqaryldy.
Belgili bolǵandaı, balalardy Aıdar Mustafın esimdi jigit qutqaryp qalǵan. Ol mamandandyrylǵan halyqqa qyzmet kórsetý ortalyǵynda jumys isteıdi.
«Dosym ekeýmiz órt bolyp jatqan mańaıda júrgenbiz. Kenet kómekke shaqyrǵan balanyń daýysyn estip, sol jaqqa júgirdik. Jataqhananyń ekinshi qabatyndaǵy balkon janyp jatty. Sol ýaqytta qutqarýshylar úıdegi adamdardy oqshaý jerge kóshirip úlgirgen. Balkon shetinde jas otbasy turdy. Kómekke shaqyrǵan solar eken. Men birinshi qabattaǵy terezeniń jaqtaýyna deıin shyǵyp, balalardy tómen túsirdim. Maǵan qasymda turǵan taǵy bir adam kómektesti», - deıdi A.Mustafın.
Munan soń oqıǵa ornyna órt sóndirýshiler jetti. Olar ekinshi qabatqa shyǵatyn baspaldaq qoıǵan.
«Men de órtenip jatqan páter ishine kirdim. Bólmelerdi aralap salqyn sý quıylǵan legendi taýyp aldym. Ormaldy sýlap alyp, tútin kirmeýi úshin, kórshi esiktiń astyna qoıdym. Onda taǵy bir otbasy qalyp qoıǵan bolatyn. Sodan keıin polıtseıler de jetti», - dep eske aldy Aıdar.
Aıdar Mustafın óziniń bul áreketin árbir azamattyń mindeti dep biledi.
