Qostanaılyq elektromobılder sherýi Ortalyq Azııanyń eń iri kópirinen ótti
QOSTANAI. QazAqparat - Qostanaıda shyǵarylǵan JAC markaly elektromobılder sherýi Ertis ózeninde ornalasqan Ortalyq Azııanyń eń iri kópir ótkelinen júrip ótti, dep habarlaıdy QazAqparat tilshisi.
Kópirdiń ashylý rásimi 14 jeltoqsan kúni QR Táýelsizdiginiń 25 jyldyǵy qarsańynda ótti. Kópir QR Prezıdenti Nursultan Nazarbaevtyń tapsyrmasymen salyndy jáne bul «Nurly jol» - «Ortalyq-Shyǵys» kóliktik dálizi baǵdarlamasynyń bóligi bolyp tabylady.
Merekelik ashylý rásimi aıasynda zamanaýı kópirden alǵash ret qazaqstandyq avtoóndiris draıverleri - qostanaılyq zaýytta óndirilgen elektromobılder men avtomobılder - JAC iEV5, JAC iEV5S, JAC i3, SsangYong, JAC S3, JAC S5 krossoverleri, sedan Peugeot 301 jáne IVECO Daily kommertsııalyq tehnıkasy júrip ótti.
Eske sala ketsek, 6 jeltoqsan kúni Jalpyulttyq telekópir barysynda QR Prezıdenti Nursultan Nazarbaev qazaqstandyqtardyń elektromobılge aýysýyn armandaıtynyn aıtqan edi.
«Qazir Qostanaıda elektromobılder óndirilip jatyr. Men barsha Qazaqstannyń elektromobıl mingenin armandaımyn. Onyń baǵasy qoljetimdi bolady, ásirese aýasy lastanǵan Almaty, Óskemen turǵyndarynyń mingeni durys. Eger tolyqtaı elektromobılge aýystyrar bolsaq, onda bizdiń aýamyz tazaryp, birneshe ese únem jasaıtyn edik. Biz osyǵan jaqyndap kelemiz», - dedi Nursultan Nazarbaev.
