Qostanaılyq eks-polıtseı kásipkerdi bopsalap, aqsha talap etken
QOSTANAI. QazAqparat - Rýdnyı qalasynda ǵımarat ishine kirip, aqsha talap etken eks-polıtseıge qatysty sot isi bastaldy, dep habarlaıdy QazAqparat oblystyq sottyń baspasóz qyzmetine silteme jasap.
Sot aldynda buryn isti bolǵan polıtsııa qyzmetkeri Samat Naýryzov jaýap berdi. Іs derekterinde kórsetilgendeı, óńirlik Polıtsııa basqarmasynyń uıymdasqan qylmys basqarmasynyń qyzmetkerleri 2018 jyldyń shilde aıynda sottalýshynyń páterin izdestirý barysynda qoldan jasalǵan «RPG-22» tankke qarsy granatasyn tapty. Budan bólek, tártip saqshylary jýynatyn bólmeden sottalýshyǵa syıǵa berilgen oq-dárilerdiń baryn anyqtady. Jatyn bólmeden 7,62 kalıbrli eki jaýyngerlik patron tabyldy.
Vedomstvoda málim etilgendeı, 2018 jylǵy 18 shildede eks-polıtseı birneshe adammen aldyn ala sóz baılasý arqyly jergilikti keńse ǵımarattarynyń birine kiredi. Olar zorlyq-zombylyq sharalaryn qoldana otyryp, keńse ishindegi kásipkerge, onyń otbasy múshelerine kúsh kórsetip, 15 000 AQSh dollaryn talap etken.
