Qostanaılyq dárigerlerge jyljymaly medıtsınalyq kólikter tapsyryldy
Jyljymaly medıtsınalyq kólikter aýdandyq aýrýhanalar janynda jumys istep, shalǵaı aýyldarǵa shyǵatyn bolady. Medıtsınalyq keshenderdi Qostanaıdaǵy «SaryarqaAvtoProm» avtomobıl zaýyty qurastyrǵan. Aldaǵy ýaqytta qostanaılyq emhanalarǵa dál osyndaı taǵy on medıtsınalyq kólik berilmek. Medıtsınalyq keshen 7 kabınetten turady. Olar: jalpy qabyldaý, jalpy praktıka dárigeri, analız qabyldaý, fýnktsıonaldyq dıagnostıka, akýsher-gınekolog, sáýlelik dıagnostıka kabınetteri jáne dárihana.
«Protsedýra kezinde patsıentterdiń qaýipsizdigin qamtamasyz etý úshin avtobýsta rentgen jáne flıýorografııa úshin arnaıy jabdyqtalǵan kabınet ornatyldy. Bólme qorǵasynmen qaptalǵan. Barlyq kabınetterde zamanaýı medıtsınalyq quraldar bar. Avtobýs sonymen qatar avtomattandyrylǵan pandýspen jabdyqtalǵan. Búgingi tańda Qostanaı aýdanynda halyq sany 70 myńnan asady, biz baratyn eń shalǵaı aýyl Tobyldan 120 shaqyrym jerde ornalasqan. Sondyqtan bul zamanaýı kólikterdiń bizge berilýi aýqymdy jumystardy atqarýǵa múmkindik syılap otyr», - deıdi Qostanaı aýdandyq ortalyq aýrýhanasynyń bas dárigeri Syrlybek Meşanov.
