Qostanaılyq dárigerler ınfektsııaǵa qarsy quraldarmen tolyq qamtamasyz etilgen
QOSTANAI.QazAqparat – Qostanaılyqtar koronavırýsty anyqtaý, vırýstyń odan ári taralmaýy úshin aıanbaı eńbek etip jatqan dárigerlerge alǵys aıtty, dep habarlaıdy QazAqparat.
Jaqynda Qostanaı qalalyq aýrýhanasy jumys baǵytyna ýaqytsha ózgerister engizip, 250 oryndyq provızorlyq statsıonar qyzmetin atqara bastady. Densaýlyq saqtaý basqarmasy basshysynyń buıryǵymen provızorlyq statsıonarǵa basqa emhanalardaǵy dárigerler men medbıkeler qosymsha jumysqa alyndy. Mundaǵy patsıentter medıtsınalyq qyzmetkerlerge kásibı qyzmeti men kórsetken qamqorlyǵy úshin alǵys aıtýda. Sonyń biri – oblys turǵyny Tanzıla Vıhrova. Ol 30 maýsym kúni provızorlyq gospıtalǵa pnevmonııa dıagnozymen túsken.
«Ókpemniń 40 paıyzǵa jýyǵy qabynyp ketken bolatyn. Qazir qaýipti vırýs artta qaldy. Munyń bári medıtsına qyzmetkerleriniń kásibı sheberliginiń arqasy. Emdeý sharalary óte saýatty josparlanǵan. Ásirese, Igor Hvan bastaǵan abzal jandarǵa alǵys aıtqym keledi. Emotsııaǵa berilip, dárigerler tarapyna qatty aıtyp qalsaq, keshirim suraımyn. Bárin basqa túskende kóresiń. Qazir jaǵdaıym jaqsy. Dárigerlerdiń naýqastarǵa degen qamqorlyǵy sheksiz», - dep atap ótti Tanzıla Vıhrova.
Oblysta medıtsına qyzmetkerleri qajetti jeke qorǵanysh quraldarymen, ınfektsııany emdeýge arnalǵan dárilik preparattarmen tolyqtaı qamtamasyz etilgen.
