Qostanaılyq dáriger-hırýrg úsh myńnan astam ota jasaǵan
QOSTANAI. QazAqparat – Dáriger qaýymy adamdardyń amandyǵyna asa jaýappen qarap, densaýlyǵynyń jaqsy, qalypty jaǵdaıda bolýyna úzbeı úlesin qosyp keledi. Aq jeleńdi jandardyń eńbegin qoǵam joǵary baǵalaıdy. Sondaı dárigerlerdiń biri – qostanaılyq Margarıta Bısenova. Onyń esimi álem halyqtarynyń entsıklopedııasyna jazyldy, dep habarlaıdy QazAqparat tilshisi.
Qazaqta «Aýyryp jazylǵan jan – olja», degen ulaǵatty sóz bar. Sol «oljańyzdy» sizge syılaıtyn jan – dáriger. Keıipkerimiz Margarıta Beısenovanyń adam janyna arasha túsip kele jatqanyna 30 jyldan asty.
«Qazirgi Beıimbet Maılın aýdanynda týdym. Dáriger mamandyǵy júrek qalaýym boldy. 1983 jyly Qaraǵandy memlekettik medıtsına ınstıtýtyna oqýǵa tústim. Dáriger-hırýrg mamany atanyp, eńbek jolymdy bastadym. 1989 jyly Jitiqara aýdandyq ortalyq aýrýhanasynyń qabyldaý bólimine meńgerýshi bolyp keldim. Bir jyldan soń aýdandyq aýrýhananyń bas dárigeriniń emdeý-aldyn alý jumysy jónindegi orynbasary qyzmetine aýystym», - deıdi Margarıta Bısenova.
Qyzmetin qaltqysyz atqaryp kele jatqan dáriger ǵasyr almasar tusta aýdandyq aýrýhananyń bas dárigeri laýazymyna taǵaıyndaldy. Mine, medıtsına salasynyń qyzyǵy men shyjyǵy endi bastalǵan-dy.
«Osy ýaqytqa deıin dáriger-hırýrg retinde 3000-nan astam shuǵyl ota jasappyn. Oılanyp otyrsań, jumyr basty ár pende jaryq dúnıeniń qyzyq-qýanyshyn kóp kórsem deıdi ǵoı. Áıteýir, árdaıym osyndaı ońdy adamı tilektiń jeteginde bolatynymyz da ras. Sondaıda túrli syrqatqa boı aldyryp, aldyńa kelgen naýqasqa barynsha kómektesýge tyrysasyń. Ómirine arasha túsip, alyp ketýge daıyn ajaldyń betin qaıtarsań, dáriger úshin odan úlken baqyt joq shyǵar», - dep tolyqtyrdy ol.
Margarıta Bısenova únemi basshy laýazymdarda jumys isteı júrse de, negizgi jumysy hırýrgııa salasyn qatar ustap júredi. Sondaı-aq anestezıolog-reanımatolog retinde de ózin jaqsy qyrynan kórsetti.
«Instıtýt bitirgennen keıin eki jyl boıy anestezıolog-reanımatolog bolyp jumys istedim. Qursaq qýysy men keýde qýysy, iriń tıgen organdardyń operatsııasyna aralasamyn. 2004 jyly bir aı boıy AQSh aýrýhanalarynda tájirıbeden óttim. Eńbegim elenip, esimimdi álem halyqtarynyń entsıklopedııasyna jazdy», - dep atap ótti aq halatty abzal jan.
2010 jyly ol oblystyq aýrýhananyń bas dárigeriniń orynbasary qyzmetine taǵaıyndaldy. Qazirgi ýaqytta Qostanaı qalasyndaǵy № 4 emhananyń bas dárigeri.
Dáriger-hırýrg retinde de, basshylyq qyzmette de Margarıta Bısenovanyń jumysy joǵary baǵalandy. 2011 jyly «Qazaqstan Respýblıkasy densaýlyq saqtaý isiniń úzdigi», 2010 jyly «QR Densaýlyq saqtaý salasynyń qurmetti qyzmetkeri» tósbelgisimen marapattaldy. 2016 jyly respýblıkalyq «Úzdik densaýlyq saqtaý menedjeri» ataǵyn ıelendi. Esimi «Qazaqstannyń Densaýlyq saqtaý elıtasy» kitabyna engizilgen.
