Qostanaılyq cover-top Nurtas pen Erkeniń ánderin oryndady
QOSTANAI. QazAqparat - Qostanaıdaǵy «Rısýnkı vetrom» cover-toby halyq arasynda hıt bolǵan ánderdi túrli aspaptarǵa salyp oryndaıdy. Top jóninde keńirek bilý úshin «QazAqparat» HAA tilshisi onyń solısi Maksım Goltsvartpen suhbattasqan edi.
- Maksım, mýzykaǵa qalaı keldińiz? Qandaı aspaptarda oınaı alasyz?
- Barlyǵy qaladaǵy mýzyka mektebinen bastaldy. Meni onda anam alyp bardy. Anamnyń keńesimen fleıta synybyn tańdadym. Ol kezde 6 jasta bolatynmyn. Mine, 13 jyl boıy qolymnan fleıta túsken emes. Mýzyka mektebine túsken ár shákirt fortepıanony úırenýge mindetti. Bul aspapty da meńgerdim.
- Siz «Rısýnkı vetrom» tobynyń múshesisiz? Áriptesterińiz týraly aıta ketseńiz...
- Qazir biz repertýardy tolyqtyrý jumystarymen belsendi aınalysýdamyz. Skrıpkashy Ekaterına Poddýbnaıa jáne gıtarashy Natalıa Zakoramen bir jyl buryn tanystyq. Sol ýaqyttan bastap top qurýǵa bekindik.
- Qorjyndaryńyzda qandaı kompozıtsııalar bar? Qaı ánderdi kóbirek oryndaısyzdar?
- Qazaq, orys, shetel ánderi... Biz bir janrdy tańdap, sonymen júrmeımiz. Jurtqa unaǵan ánderdi oryndaýǵa tyrysamyz. Árıne, óz týyndylarymyz da joq emes.
- Instagram jelisindegi jeke paraqshańyzda jumystaryńyz týraly vıdeoesep berip otyrasyz. Ártúrli kompozıtsııalardy biriktiretin beınejazba jasaý qanshalyqty qıyn?
- Men jeke paraqshamda ózimniń jeke jumystarymdy jarııalap otyramyn. Al fleıta partııalary men bıtboksty bólek jazyp, arnaıy baǵdarlamanyń kómegimen montajdaımyn. Keıin tolyqqandy vıdeo shyqqan soń, áleýmettik jelige salamyn.
- Jaqynda siz fleıtamen Erke Esmahannyń ánin oryndap, kóp qaralym jınadyńyz. Repertýaryńyzda basqa qandaı qazaq ánderi bar?
- Meniń oryndaýymdaǵy Erkeniń «Qaıda?» áni tanymal bolady dep oılaǵan joqpyn. Bálkim, qazir bul án hıtke aınalǵandyqtan shyǵar. Mýzykant úshin tyńdarmandardyń kóńilinen shyǵý asa mańyzdy. Osyny eskerý qajet.
- Toptyń josparlary týraly aıtsańyz. Tyńdarmandy qandaı jańalyqtarmen qýantpaqsyzdar?
- Búginde «Rısýnkı vetrom» tobymen qazaq ánderin oryndaý ústindemiz. Ásirese, Qaırat Nurtas, Erke Esmahan syndy tanymal ánshilerdiń shyǵarmashylyǵyn tańdadyq. Damý úshin áli kóp jumys isteý qajet. Bastysy, tyńdarmannyń jaqsy baǵasyn alý.
