Qostanaılyq boıjetkendi Astanada kólik qaqqany týraly aqparat jalǵan - Astana PD
ASTANA. QazAqparat - Qostanaılyq boıjetkendi Astanada kólik qaqqany týraly aqparat jalǵan, dep habarlaıdy QazAqparat tilshisi elordanyń Polıtsııa departamentiniń baspasóz qyzmetine silteme jasap.
Aıta ketsek, osyǵan deıin respýblıkalyq BAQ quraldarynda Qostanaı oblysy Denısov aýdanynyń 26 jastaǵy turǵyny Sabına Júnisbekovanyń joǵalyp ketkeni týraly aqparat taraǵan bolatyn. Týystary Sabınanyń ótken jyldyń jeltoqsanynyń sońynda elordaǵa jumys izdep ketkenin habarlaǵan. Sabınanyń ákesi habarlasqan kezde tutqany belgisiz áıel kóterip, qyzyn kólik qaǵyp ketkenin aıtyp bergen-mys. Tipti boıjetkendi belgisiz kólikke otyrǵyzyp, bireýlerdiń alyp ketkeni týraly áńgime taraǵan edi.
Bul oqıǵaǵa baılanysty búgin Astana qalasynyń Polıtsııa departamenti resmı habarlama taratty.
«16 qańtar kúni Álıhan Bókeıhan kóshesi 12-shi úıdiń mańynda birtúrli áreketimen jáne syrt kımi joq boıjetkenniń júrgeni týraly polıtsııaǵa habar kelip tústi. Tekserý barysynda ol boıjetkenniń 26 jastaǵy Sabına Júsinbekova ekeni anyqtaldy. Ol 16 qańtar kúni iz-tússiz joǵalyp ketken bolatyn. Boıjetkenniń joǵalǵany týraly týǵan-týystary habar bergen edi», - delingen Astana qalasy Polıtsııa departamentiniń habarlamasynda.
Budan soń Sabına Júsinbekova belgisiz zatpen ýlaný belgisi boıynsha Astana qalalyq aýrýhanasyna jetkizilgen.
«Osyǵan deıingi boıjetkenniń jol-kólik oqıǵasyna tap boldy degen aqparat rastalmady. Qazirgi ýaqytta Sabına Júnisbekovanyń jaǵdaıy turaqty. Denesinde eshqandaı jaraqat ta, ómiri men densaýlyǵyna tónip turǵan qaýip te joq. Boıjetken týǵan-týystary men dárigerlerdiń qaraýyna berildi», - delingen habarlamada.
Qazirgi ýaqytta jalǵan aqparat taratý faktisi boıynsha tekserý jumystary júrgizilip jatyr.
Aıta keteıik, osyǵan deıin izdeý salynǵan qostanaılyq qyzdyń Astanadan tabylǵandyǵyn habarlaǵan edik.
Foto: alau.kz
