Qostanaılyq boıjetken eki aıda 42 márte jol erejesin buzǵan

QOSTANAI. QazAqparat – Qostanaılyq polıtseıler «Saqtandyrý polısi» jedel aldyn alý is-sharasy barysynda ákimshilik jaýapkershilikten jaltarǵan júrgizýshilerdi ustady, dep habarlaıdy QazAqparat oblystyq polıtsııa departamentiniń baspasóz qyzmetine sileme jasap.

Tártip saqshylary «Mazda» kóligin tizgindegen 21 jastaǵy Qostanaı turǵynyn toqtatty. Ol jol erejesin júıeli túrde buzyp kelgen. Ol 2020 jyldyń qazan jáne qarasha aılarynda ǵana 42 márte jol qozǵalysy erejelerin buzǵan. Avtomatty tirkeý quraldary júrgizýshiniń aıyppul somasy 1 mln teńgeden asqanyn kórsetti. Jergilikti turǵyn aıyppulynyń baryn bile tura, tólemegen.

«Polıtsııa 13 ret jol erejesin buzǵan «Vaz 21099» avtokóliginiń júrgizýshisin ustady. Ol 194 myń teńge aıyppulyn tólemeı júrgen. Sondaı-aq Amangeldi aýdanynyń polıtsııa bóliminiń qyzmetkerleri Arqalyq-Torǵaı tas jolynda Reseıde tirkeýde turǵan «KIA Spektra» avtokóligin toqtatty. Tekserý barysynda avtokóliktiń Chelıabi oblysynda urlanǵany anyqtaldy. Kólik 2017 jyldan bastap halyqaralyq polıtsııa jelisi boıynsha izdeýge alyndy. Joǵaryda atalǵan barlyq júrgizýshilerde saqtandyrý qujaty bolmaǵan, sondyqtan olardyń avtokólikteri aıyp turaǵyna qoıyldy», - deıdi polıtsııanyń baspasóz qyzmeti mamany Kenje Qonysbaı.

«Saqtandyrý polısi» operatsııasy bastalǵaly tártip saqshylary saqtandyrý polısiniń joqtyǵy úshin 304 júrgizýshini ákimshilik jaýapkershilikke tartty, aıypturaqqa 132 kólik qoıylyp, 65 memlekettik nómir alynyp tastaldy.