Qostanaılyq bos ýaqytynda eńbek etkeni úshin jumystan qýylǵan
QOSTANAI. QazAqparat - Jumystan zańsyz shyǵarylǵan Qostanaı oblysy turǵyny sot sheshimimen burynǵy jumysyna qaıta alyndy, dep habarlaıdy QazAqparat tilshisi.
Lısakov qalasynyń turǵyny qalalyq ákimdiktiń mádenıet jáne sport ortalyǵy memlekettik mekemesine jumysqa qaıta ornalastyrý jáne májbúrli bos júrgen ýaqyty úshin ótemaqy óndirý týraly shaǵymymen sotqa júgingen. Shaǵym ıesiniń málimdeýinshe, 2013 jyldyń 31 qańtarynan ol atalǵan kásiporynǵa mýzykalyq jetekshi retinde 47 myń teńge eńbekaqyǵa, aptasyna bes kúndik jumys kestesimen jumysqa qabyldanǵan.
Ústimizdegi jyldyń 25 qańtarynda «Mádenıet jáne sport ortalyǵy» memlekettik mekemesi dırektorynyń mindetin atqarýshy Eńbek kodeksiniń 52-baby 2-bóligi negizinde, ony qosymsha basqa jerde eńbek etetindikten jumystan shyǵaryp jibergen. Azamat B. balalar jáne jasóspirimder shyǵarmashylyǵy úıinde kúnine eki saǵat jumys istegen. Degenmen, ol qosymsha jumysty negizgi jumys ornynda segiz saǵattyq jumys ýaqytyn ótegennen soń atqarǵan.
Óziniń jumystan shyǵarylýyn zańsyz dep sanaǵan B. sottan jumysqa qaıta ornalastyrýdy jáne 2017 jyldyń qańtarynan búgingi kúnge deıin májbúrli bos júrgen ýaqyty úshin eńbekaqy óndirýdi suraǵan.
Іsti qaraý nátıjesinde sot azamat B-nyń shaǵymyn qanaǵattandyryp, «Lısakov qalalyq ákimdiginiń mádenıet jáne tilderdi damytý bólimi» memlekettik mekemesine qarasty mádenıet jáne sport ortalyǵynyń B-ny jumystan shyǵarý týraly buıryǵy joıyldy. Talapker burynǵy jumys ornyna qaıta ornalastyrylyp, 352 myń teńge kóleminde eńbekaqysy óndirildi.
Sot sheshimi zańdy kúshine engen joq.
