Qostanaılyq balýan qazaq kúresinen álem chempıony atandy

- Erlan, jeńis qutty bolsyn! «Qazaqstan barysy» men «EKSPO-2017» kórmesindegi jarystan soń kóp uzamaı álem chempıonatyna attandyńyz. Qıynǵa soqqan shyǵar?

-  Árıne, álem chempıonatyna «sen tur, men ataıyndardyń» barlyǵy keledi. Elimizde ótken aýqymdy jarystardan keıin baıraqty básekege qatysý kez kelgenimiz úshin ońaıǵa tımegeni anyq. Tipti, birinshi beldesýde-aq tizemdi shyǵaryp aldym. Degenmen, bul - sport. El namysyn arqalap kelgen soń áýelgi mindet abyroımen kúresý boldy. Qalaýyn tapsań, kez kelgen qıyndyqtan ótýge bolady. Áıtpese, birde respýblıkalyq týrnırde jeńip kele jatyp, beldesýdiń aıaqtalýyna 20 sekýnd qana ýaqyt qalǵanda, utylyp qalǵanym bar... Úlken zalda qanshama myń adam saǵan kóz tigip otyrady. Aıǵaı-qıqý, mýzyka, jaryqtyń bári saǵan áser etedi. Sol kezde eń aldymen psıhologııalyq ishki túısik daıyndyǵy asa qajet. Eger óz-ózińdi sol jerde qaıraı bilseń, sóz joq, jeńiske jettiń!

-   Bul dodada qaı elderdiń balýandary boldy?

-  Alǵashqy aınalymdarda Polsha men Qytaı sportshylaryn uttym. Sodan soń tájirıbeli ázirbaıjandyqpen shyqtym. Bul joly da baǵym jandy. Jartylaı fınalda latvııalyq balýandy jeńdim. Al, fınalda ataqty reseılik, dzıýdodan halyqaralyq dárejedegi sport sheberi Aleksandr Roslakov kútip turdy. Jaraqatym qaramastan, beldesýdi abyroımen aıaqtadym.

-  Sóıtip, bilektiler básekesinen ozyq shyqtyńyz. Jalpy, álem chempıonatyn kim uıymdastyrdy?

- Erler arasynda 7-shi ret, áıelder arasynda tuńǵysh ret ótkizildi. Dúnıejúzilik qazaq kúresi federatsııasy jáne Birikken kúres odaǵy uıymdastyrdy. Barlyǵy otyzǵa jýyq elden balýandar qatysty. Bul qazaqtyń tól sport óneriniń damyǵanyn kórsetedi. Bıylǵy əlem chempıonaty dańqty sportshy, Belarýs qazaq kúresi federatsııasynyń qurmetti prezıdenti Aleksandr Medvedtiń qurmetine oraı uıymdastyryldy. Sondaı-aq, tuńǵysh ret názikjandylar arasynda álem chempıondary anyqtaldy.

- Áńgimeńizge rahmet!