Qostanaılyq balǵyndar Elbasy shyrshasynda baǵaly syılyqtarǵa ıe boldy

Merekelik is-sharaǵa oblystyń aýdan, qalalarynan daryndy balalar qatysty. Kóńildi keshte qýyrshaq teatry men estradalyq-tsırktiń ónerpazdary ártúrli qoıylymdar usyndy. Balalar mýltfılm keıipkerlerimen birge bılep, hormen án aıtty. Olar teledıdar arqyly Prezıdenttiń quttyqtaýyn tyńdap, Elbasyǵa alǵys aıtty.

Memleket basshysy óziniń quttyqtaý sózinde: «Qadirli balalar! Jańa jyl barshamyz asyǵa kútetin mereıli meıram, jaqsylyq jarshysy. Bul, eń aldymen, balalardyń merekesi, kishkentaılardyń qýanyshy. Sender baqytty urpaqsyńdar. Keler jańa jylda barlyǵy da ózgeshe bolady. Sender jańa jetistikterge jetesińder, jańa bilim alasyńdar, keremet jańalyqtar ashasyńdar. Qashanda otbasylaryńa degen sheksiz súıispenshilikteriń, dostaryńa degen adaldyqtaryń, ustazdaryńa degen qurmetteriń bolsyn. Uly dala eliniń ulaǵatty ulandary únemi aldyńǵy qatarda bolýy kerek. Biz senderdiń aqyldy da alǵyr, zerdeli de zerek bolyp ósýlerińdi qalaımyz. Elimizdiń bolashaǵyn senip tapsyratyn úkili úmitimiz ózderińsińder Sol úshin bizdiń memleketimiz barlyq múmkindikti jasap berdi»,- dedi.

Elbasynyń quttyqtaýynan soń Qostanaı oblysynyń ákimi Arhımed Muhambetov sóz aldy. Arhımed Begejanuly óńirde balalarǵa barynsha jaqsy jaǵdaılar jasalyp kele jatqanyna toqtaldy.

«Balalar - bizdiń bolashaǵymyz, baılyǵymyz, úmitimiz. Sizderge úlken úmit artamyz. Elbasy óziniń quttyqtaý sózinde sizderge jarqyn bolashaq tiledi. Eger, sizder oqýda ozat bolyp, bilikti maman atanyp, elimizdiń qarqyndy damýyna úles qosatyn bolsańyzdar, bizdiń elimizdiń bolashaǵynyń jarqyn bolatynyna kámil senimdimin. Sizder úshin qoldan kelgen jaqsylyqtardy jasaı beremiz»,-dedi oblys basshysy.

Munan soń oblys ákimi Elbasy atynan balalarǵa planshetter, Astana týraly kitap, táttiler syıǵa tartty. Balalarǵa arnalyp jańa jyldyq merekelik baǵdarlama usynyldy, qyzyqty oıyndar oınalyp, ásem ánder shyrqaldy.