Qostanaılyq bala múgedektik tólemin 7 jyl ala almaǵan
QOSTANAI. QazAqparat – Qostanaıda 7 jasar balaǵa 7 jyl boıy múgedektik toby qoıylmaǵan, dep habarlaıdy QazAqparat.
26 jastaǵy Aısulý Shıbaeva – eki balanyń anasy. Ol ekinshi toptaǵy múgedektigi úshin zeınetaqy men ataýly áleýmettik kómek alady. Jeti jyl buryn jol apatyna túsip, birqatar aýyr ota ótkergen. Bir jyldaı tósek tartyp jatqan kelinshek aıaqqa turyp, tipti, ekinshi balasyn dúnıege ákeldi. Dárigerler Aısulý Shıbaevanyń tuńǵyshyna uzaq ýaqyt boıy naqty dıagnoz qoıa almady. Onyń tserebraldy sal aýrýy bary anyqtaldy. Budan bólek, atalmysh otbasynyń turǵylyqty baspanasy joq. Sol sebepti, múgedektik toby boıynsha qujattardy rásimdeý múmkin emes. Olar sheshimin «Qostanaı – adaldyq alańy» keńselik jobasynan tapty. Onyń problemasyna oblystyq sybaılas jemqorlyqqa qarsy qyzmettiń basshysy Qýanysh Bekbasov, birqatar jaýapty memlekettik organdar men oblystyq máslıhattyń depýtattary ún qatty. Arnaıy komıssııa qurylyp, balaǵa múgedektik toby berildi.
«Bala jeti jyl boıy múgedektigi boıynsha tólem ala almaǵan. Bizdiń mindetimiz – kez kelgen azamattyń máselesin barynsha sheship berý. Birneshe memlekettik organdardyń kúsh-jigerin biriktirý arqyly Aısulý Shıbaevanyń máselesi bir jaqty etildi. Azamattar úshin yńǵaıly jáne kedergisiz orta jasaý – memlekettik qyzmet kórsetýdiń basymdyǵy. Sonymen birge bul otbasyǵa qyzmet kórsetetin mamandar bólindi», - dedi Qýanysh Bekbasov.
