Qostanaılyq ájeı naýryz kóje pisirýdiń eń ońaı tásilimen bólisti
Ulystyń uly kúni Naýryz merekesi jaqyndaǵan saıyn ár otbasy naýryz kóje isteýdi mindetim dep sanaıdy. Negizi, naýryz kójeni eldiń ár óńirinde túrlishe daıyndaıdy. Keıbiri qys týa, soǵym soıǵan ýaqytta Naýryzǵa dep etti arnaıy daıyndap qoıady. Óıtkeni, qystan qalǵan soǵymnan, súrlengen etten sorpanyń da, ondaı sorpaǵa pisirilgen kójeniń de dámi erekshe bolady.
«Naýryz kójeni jyl saıyn jasaımyn. Kójeniń retsepti molaıǵan saıyn, tıisinshe, onyń qaınaý ýaqyty da artady. Sondyqtan óz tájrıbeme súıenip, naýryz kóje daıyndaýdyń eń jeńil ári jyldam tásilin qoldanamyn. Úı ishine arnalyp jasalsa, jarty keli et, shamaly qazy-qarta, 100 gramm bıdaı men burshaq, shamaly tuz ben 3 lıtr sý qajet. Qalaýyńyz boıynsha aıran men qaımaq qosa alasyz. Túliktiń nemese ósimdik maıyn mólshermen quıý kerek», - deıdi Tursynkúl Ábdirqyzy.
Tursynkúl ájeı oblys ortalyǵynan 500 shaqyrymdaı qashyqta ornalasqan Baıǵabyl aýylynda turady. Onyń sózinshe, aýyldy jerde kójeni qaladaǵydaı gazǵa emes, kóbine peshke pisiredi.
«Pesh otynyń ortasha kúıde bolýy mańyzdy. Et pen qazy-qarta qaınaǵan soń sorpasynyń kóbigin alýdy umytpaǵan jón. 1 saǵattaı qaınatyp, etti súzip alyńyz. Daqyldardy jaqsylap jýyp, 5 mınýttaı qaınaýǵa qoıyńyz. Tuzdy talǵamǵa qaraı sala berińiz. Daqyldar pisti-aý degen kezde ottan túsirip, salqyn jerge qoıǵan durys. Sonda taǵamnyń ıi qanady», - dep túsindirdi ájeı.
Tursynkúl Ábdirqyzy naýryz kójeni baptap qana qoımaı, ony saqtaýdyń da birneshe tetikterin oılastyrý qajettigin alǵa tartady.
«Naýryz kójeni saqtap, ony naryqqa shyǵarý jaǵy kemshin tusymyzǵa aınaldy. Taǵamtaný mamandary osyny oılansa eken. Naýryz kójege qatysty jańashyldyqqa umtylý qajettigi týyndap otyr. Qazirgi tehnologııany paıdalana otyryp, bul ónimniń ózindik brendin qalyptastyrý kerek», - dep usynysyn bildirdi aýyl turǵyny.
