Qostanaılyq azamat ómir boıyna bas bostandyǵynan aıyryldy
QOSTANAI. QazAqparat - Qostanaıda úsh adamdy óltirgen qylmyskerlerge sot úkimi shyqty, olardyń biri ómir boıyna bas bostandyǵynan aıyrylsa, ekinshisi 20 jylǵa sottaldy.
Bul týraly «QazAqparat» HAA tilshisi habarlaıdy. 39 jastaǵy Alekseı Sýprıadkın men 37 jastaǵy Aleksandr Konovalov úsh adamdy qatygezdikpen óltirgenderi úshin kináli dep tanyldy.
Olardyń qurbandary qylmys jasalý barysynda dármensiz kúıde bolǵan. Qylmyskerler jeke sharýashylyqta jaldamaly jumys jasap, monshaǵa arnalǵan qaıyń sypyrtqylaryn daıyndaýmen aınalysqan. Sýprıadkın men jumys berýshiniń arasynda týyndaǵan janjaldan keıin jumysshy kek saqtap qalǵan. Birshama ýaqyt ótken soń Sýprıadkın Konovalovpen birge jumys kúninen keıin ishimdik iship otyryp, olardy jalaqysyz qaldyrýy múmkin degen boljam jasaıdy. Solaı, jumys berýshi men onyń eki tanysyna kek qaıtarýdy sheshedi. Qylmysty sol túni Sýprıadkın baltanyń kómegimen júzege asyrady. Konovalov onyń janynda bolǵan jáne sybaılasyna áli de tiri jatqan adamdy nusqap kórsetken. Sýprıadkın ony óltirgen. Qylmyskerler óli denelerdi adam joq jerge - greıderdiń jyrasyna laqtyryp jiberedi. Odan keıin qylmys ornynan boı tasalap, Rýdnyı qalasyna bet alǵan. Onda olar kóp uzamaı polıtsııa qyzmetkerleriniń qolyna túsedi.
Sot Sýprıadkınge jazasyn erekshe rejimdegi túzeý kolonııasynda óteýmen ómir boıyna bas bostandyǵynan aıyrý úkimin shyǵardy. Konovalov jazasyn qatań rejimdegi túzeý kolonııasynda óteýmen 20 jylǵa sottaldy.
