Qostanaılyq azamat aýyldardyń arasyndaǵy qardy kúrep, alǵysqa bólendi
Bıyl Qostanaı oblysynda qar jyldaǵydan kóp jaýdy. Tipti aýyl-úıdiń arasyn bitep tastady. Oblys ortalyǵynan 600 shaqyrym qashyqtaǵy Jankeldın aýdanynyń turǵyndary da biraz álekke tústi. Aýyldar men aýdan ortalyǵy arasynda qatynas úzile bastady. Osyndaıda Jankeldın aýdanynyń azamaty Bolat Halyqov kómekke keldi. Ol aýdan ortalyǵynan júz shaqyrymda jatqan Aqkól aýylynyń arasyndaǵy úıindi qardy tazartyp berdi.
«Tóbemen tutasqan qalyń qardan qora men úıdiń arasyna qatynaý qıynǵa soqty. Qansha kólik pen jolaýshy qar qursaýynda qalyp, adam ómirine qaýip tóndirdi. Aýdanǵa qatynas toqtady. Adam balasy aýyrmaı-syrqamaı turmaıdy, basqa da jaǵdaılar bolýy yqtımal. Azyq-túlik, poshta qatynasy bári jolǵa kep tireledi. Abyroı bolǵanda el azamaty Bolat Moldahalyquly kúndiz-túni damyl tappaı, kúre joldy kúreýmen boldy. Sonyń arqasynda jolǵa shyqqan jolaýshylarymyz da qaýip-qaterge urynǵan joq. Barar jerge mezgilinde jettik. Poshta, jedel-járdem qatynasynda irkilis bolmady. Barsha Aqkól aýylynyń turǵyndary atynan azamatymyzǵa alǵysymyzdy bildiremiz», - deıdi aýyl turǵyny S.Muqan.
Qystaı «jol kúzetken» azamatqa aýdan ortalyǵy irgesindegi Shegen aýylynyń turǵyndary da alǵys aıtady. Bolat Halyqov volonterlik jumysyn qar erigenshe jalǵastyrmaq.
