Qostanaılyq áıel tisin juldyrǵan soń úsh ret ota jasatyp, 20 keli salmaq tastaǵan
50 jastaǵy Inna ıAkovleva osydan eki aı buryn Qostanaıdaǵy stomatologııalyq klınıkalardyń birine júginedi. Dárigerler flıýs (qyzyl ıektiń irińdeýi) degen dıagnoz qoıdy.
«Qabynǵan tisti julyp alǵan soń dárigerler taǵy úsh ota jasaý kerektigin aıtty. Sebebi, tiske ınfektsııa túsip, túrli aýrýlarǵa shaldyǵý qaýpi tóngen. Buǵan kóndim. Betimdi úsh-tórt jerden tilip qana irińdi aldy. Tesilgen jerlerge arnaıy tútiksheler salyp qoıdy. Bir jarym aıdyń ishinde 20-22 keli salmaq tastadym. Bastapqyda basqasha edi, qazir túrli antıbıotıkter boıyma taralyp, hálim qıyndap barady», - deıdi qala turǵyny.
Inna ıAkovleva birneshe kún buryn aýrýhanadan ketip qalǵan.
«Aǵzam ábden álsiregenin sezdim. Tórtinshi ota jasaý qajettigin aıtqanda, kelispedim. Shynymdy aıtsam, dárigerlerge degen senimim azaıyp ketti. Betime taǵy da tilik salǵyzýǵa jol bergim kelmedi. Ekinshi jaǵynan 11 jasar ulym úıde jalǵyz», - dep bazynasyn aıtady ol.
Otbasynyń basyna túsken taýqymet munymen shektelmeıdi. Jalǵyzilikti ana ulymen birge Qostanaı-2 shaǵyn aýdanyndaǵy eski úıdi jalǵa alyp, panalap otyr. Turaqty jumysynan da aıyrylyp qalypty. Endigi úmiti - jomart jandarda.
«Úıdiń qabyrǵalary juqa. Shuryq-tesik jerleri kóp. Qys kele jatyr. Otyn-sý jaǵy da qıyndaıdy. Ulym tórtinshi apta sabaqqa barǵan joq. Qaıyrymdy kisilerden kómek suraýǵa májbúr bolyp otyrmyz»,- deıdi Inna ıAkovleva.
