Qostanaılyq áıel «alımentti az tóleısiń» dep eks-kúıeýin soqqyǵa jyqqan
QOSTANAI. QazAqparat - Qostanaı oblysynyń turǵyny burynǵy kúıeýin balasyna az alıment tólegeni úshin soqqyǵa jyqqan, dep habarlaıdy QazAqparat tilshisi oblystyq sottyń baspasóz qyzmetine silteme jasap.
«Erli-zaıyptylar zań júzinde ajyrasqannan keıin araqatynastary tipten nasharlap ketken. Ekeýiniń arasynda kezekti janjal bastalyp, saldarynan kelinshek er adamdy soqqyǵa jyǵyp, denesine zaqym keltirgen. Sot otyrysynda kúdikti áıel zardap shekken azamatpen ajyrasyp ketkenin málim etti. Olardyń kámeletke tolmaǵan 2 jasar ortaq balasy bar. Kelinshek kinásin moıyndamaı, balanyń ákesi jala japqanyn aıtyp otyr. Bir-birimen tatýlasatyn oılary joq», - deıdi oblystyq sottyń baspasóz qyzmetiniń ókili.
Zardap shekken er adam sotqa burynǵy áıelimen únemi bala úshin janjaldasatynyn aıtty. Al kelinshek burynǵy kúıeýi alıment tólemeıtindikten balamen kórisýge ruqsat bermeıtinin jetkizdi. Qoqan-loqqyǵa shydamaǵan erkek qamqorshylyq jáne qorǵanshylyq organdaryna baryp, shaǵym túsirgen. Nátıjesinde áke men balanyń kezdesýine arnaıy saǵattar bólindi.
Sot balanyń anasyn 34 myń teńge kóleminde aıyppul salý túrindegi ákimshilik jaýapkershilikke tartty.
