Qostanaılyq avtopark ıeleri jolaqy tarıfin qymbattatýdy surady
QOSTANAI. QazAqparat – Qostanaılyq jolaýshylar tasymaldaýshy kompanııalarynyń basshylary jolaqy qunyn ósirýdi surap, ákimdikke ótinish jazdy, dep habarlaıdy QazAqparat.
Qostanaıdaǵy qalalishilik avtobýstarda jol júrý qunyn kóterý máselesi sońǵy jyldary jıi kóterilip júr. Tasymaldaýshy kásiporyndar tarıftiń tómendiginen zardap shegip otyrǵandyǵyn aıtyp, shaǵymdanýdan jalyǵar emes. Kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl keńesiniń otyrysynda bul másele taǵy aldan shyqty.
«2015 jyly QR Investıtsııalar jáne damý mınıstrligi jolaýshylar tasymaldaýshy kásiporyndardyń shyǵyndaryn óteý erejesin bekitken. Osyǵan sáıkes ákimdik bekitken tarıf naqty jol júrý qunynan áldeqaıda tómen. Máselen, qazir Qostanaıda jol júrý quny 80 teńge. Biz muny 140 teńgege deıin arttyrýdy suradyq», - deıdi avtobýs júrgizýshisi Andreı Chebotko.
Qostanaılyq jolaýshy tasymaldaýshylar eski mashına parkin jańartý úshin qomaqty qarjy qajet deıdi. Óńirdegi 386 avtobýstyń 97 paıyzy jeti jyldan artyq paıdalanylǵan. Jolaqy ósirýdiń bir sebebi – osy tozyǵy jetken kólikterdi jańartý.
Ótken jyldyń qazan aıynda Úkimet basshysy ákimdikterge tarıftik komıssııalardyń jumysyn uıymdastyrý úshin 2020 jylǵa qarajat bólý máselesin qarastyrýdy tapsyrǵan. Endi bul jolaqyny qymbattatý nemese tıisti baǵada ustap turý ákimdikte ótetin jıynda qaralmaq.
