Qostanaılyq avtoóndirýshilerge Joldaýdyń basymdyqtary túsindirildi
Aıgúl Shaıymova Elbasynyń Joldaýyn túsindirý boıynsha úgit-nasıhat tobynyń múshesi retinde Qostanaıdaǵy avtoóndirýshilermen kezdesti. Basty maqsat - eldiń turmysyn jaqsartýǵa arnalǵan Joldaýdyń basymdyqtaryn jetkizý.
«Joldaýda kórsetilgen jeke kásipti qoldaý baǵyttary, ásirese, otandyq bıznestiń básekege qabilettiligin arttyrýǵa jáne eksport naryǵyn keńeıtýge múmkindik beredi. Eldiń tabysty damýy bıznestiń turaqty jumys isteýine baılanysty. Óndiristi bilikti mamandar ǵana óristetedi. Osyǵan asa mán bergen durys», - dedi Aıgúl Shaıymova.
Sondaı-aq agenttik tóraǵasynyń orynbasary zaýyttaǵy kólik qurylǵylaryn jınaý tsehynyń jumysymen tanysty. Qazirgi ýaqytta munda JAC, Peugeot, IVECO, ANKAI, Hyundai, Ravon, Chevrolet Niva markaly avtokólikter shyǵarylady. Zaýytta 1400 adam turaqty jumyspen qamtylǵan. Jaqynda «SaryarqaAvtoProm» «Qazaqstannyń eń úzdik taýary» atalymynda jeńiske jetken bolatyn.
Aıgúl Shaıymova aldaǵy ýaqytta halyqtyń tabysyn arttyrý úshin shaǵyn jáne orta bıznesti damytýǵa barynsha qolaıly jaǵdaı jasalatynyn aıtty. Osy rette bıznesti zańsyz ákimshilik kedergilerden qorǵaýǵa basymdyq berilmek.
QR Memlekettik qyzmet isteri agenttiginiń oblystyq departamentiniń basshysy Salaýat Múksimovtiń aıtýynsha, bıznes ókilderine arnalyp jobalyq keńse ashyldy. Ortalyq atalǵan saladaǵy kedergiler men sybaılas jemqorlyq áreketteriniń aldyn alý máselelerimen aınalysady jáne memlekettik qyzmet túrleriniń ashyqtyǵyn qamtamasyz etedi.
Aıta keteıik, Elbasy bıylǵy qazan aıynda jarııalaǵan Joldaýynda memleket ákimshilik kedergilerdi azaıtý barysynda kóptegen tekseristen, ruqsat berý jáne basqa da rásimderden bas tartqanyn aıtqan bolatyn.
Sondaı-aq, Elbasy 2019 jylǵy 1 qańtardan bastap shaǵyn jáne orta bızneske salyq amnıstııasyn jarııalady.
