Qostanaılyq avtobýstarǵa «Ońaı» kartasy engizilmek
QOSTANAI. QazAqparat - Qostanaı qalasyndaǵy qoǵamdyq kólikterge elektrondy bılet engiziledi. Bul týraly búgin turǵyndarǵa esep berý kezdesýinde qala ákimi Bazyl Jaqypov málimdedi, dep habarlaıdy QazAqparat tilshisi.
Qostanaı qalasynda qoǵamdyq kólikte júrý úshin jol aqysy qolma-qol aqshamen emes, «Ońaı» elektrondy kartasy arqyly tólenedi.
«Biz Almaty qalasynyń tájirıbesine súıenip, avtobýstarǵa elektrondy bılet engizýdi qolǵa almaqpyz. Qazir mamandar jolaýshylar kóliginiń qyzmeti jóninde monıtorıng jasap jatyr. Bul turǵyda turǵyndardyń pikiri mańyzdy. Barlyǵy josparly túrde iske assa, «Ońaı» kartasy jaqyn arada-aq jolaýshylar ıgiligine beriledi», - dep habarlady Jaqypov óz baıandamasynda.
Jıynda belgili bolǵandaı, bıyl jańadan 50 otandyq avtobýs satyp alynady. Al jolaýshylar tasymaldaýshy kompanııany anyqtaıtyn konkýrs ústimizdegi jyldyń tamyz aıynda ótpek.
«Tamyz aıyna deıin qoǵamdyq kólikterdiń bári jolaýshylardy elektrondy bılet arqyly tasymaldaıdy. Oblystyq BAQ-da jolaqy qunynyń kóterilýi belsendi talqylanyp jatyr. Negizi, byltyr qarasha aıynda tasymaldaýshy kompanııalar avtobýs jolaqysyn ósirý týraly ákimdikke hat jazdy. Olar ózderiniń usynysynda janar-jaǵarmaı jáne avtokólik bólshekteriniń qymbattaýyn negizge alyp, jolaqyny 100 teńgege deıin arttyrýdy surady. Qazir bul suraq qalalyq qoǵamdyq keńes pen sarapshylardyń qaraýynda. Aldaǵy 30 kún ishinde naqty sheshim shyǵýy tıis», - dep túsindirdi qala ákimi.
Sondaı-aq, Bazyl Jaqypov qalalyq qoǵamdyq kólik parkiniń jańaratyny jóninde aıtty. Búginde bul jumysqa bıýdjetten qarjy bólingen.
