Qostanaılyq ártister tarıhı qoıylymnyń tusaýkeserin Mońǵolııada ótkizdi

QOSTANAI. QazAqparat – Qostanaı oblystyq Іlııas Omarov atyndaǵy qazaq drama teatry «Botaqara-Sheshenbıke» tarıhı dramasynyń tusaýkeserin Mońǵolııanyń Baıan-Ólgıı qalasynda ótkizdi, dep habarlaıdy QazAqparat.

Teatrdyń kórkemdik jetekshisi Álııa Baımahan sahnalaǵan aqyn, dramatýrg Áskerhan Aqtaıdyń týyndysy el men jer, birlik taqyrybyn tý etken. Dramada qazaq pen qalmaq arasyndaǵy soǵys qana emes, beıbitshilikke umtylys, dostyq, shynaıy mahabbat sýretteledi. Ujym dırektory Sabyraly Kemelbaev yntymaq, tatýlyq táýelsiz Qazaq eliniń de basty ustanymy ekenin atap ótti.

«Botaqara batyr men jońǵar hanymy Sheshenbıkeniń esimi ǵasyrlar boıy saqtalyp, búgingi urpaqqa jetip otyr. Olardyń kóksegen maqsaty qaı dáýirde de mańyzdy. Qaraǵandy oblysy, Balqash óńirinde Botaqara men Sheshenbıke taýy bar. Botaqara batyr ómirin qazaq dalasyn jaýdan azat etýge arnady. Onyń armany kıiz týyrlyqty kóshpeli el qazaq pen qalmaqtyń basyn qosyp, kelisim ornatý edi. Bul oıyn jońǵar táıjisiniń qyzy Sheshenbıke de qoldady. Drama osynaý tarıhı oqıǵany arqaý etti. Qoıylymdy Baıan-Ólgııdegi baýyrlar óte jaqsy qabyldady. Kásibı synshylar da joǵary baǵasyn berdi. Ártisterge kórermender ornynan tik turyp qoshemet kórsetti», - dedi Sabyraly Kemelbaev agenttik tilshisine bergen suhbatynda.

Basty rólderdi somdaǵan Asylan Kenjetaı men Móldir Qubash Mońǵolııanyń «Mádenıet salasynyń úzdigi» tósbelgisimen marapattaldy. Akter Baqytjan Tańatqanulynyń sózinshe, qostanaılyqtardyń Baıan-Ólgııdegi gastroldik sapary áli jalǵasady.

«Bizdi shekaradan qandastarymyz shashý shashyp, án-kúımen, jyrmen qarsy aldy. Aıaq-qolymyzdy jerge tıgizbeı, aımaq ortalyǵyna alyp keldi. Shetelde qazaqtardyń bylaısha toıyn jasap, as berip, emin-erkin ómir súrip otyrǵanyna marqaıyp qaldyq. Aǵaıyndarymyzdyń jergilikti ultpen tatý otyrýyna tarıhymyzdaǵy Botaqara, Sheshenbıke sekildi tulǵalarymyzdyń dáneker bolýy sebep bolǵanyna kózimiz jetti. Al spektakl premerasyna Qazaqstandaǵy, Reseıdegi, Mońǵolııadaǵy Dúnıejúzi qazaqtary qaýymdastyǵy ókilderi, memlekettik laýazymdaǵy azamattar kelip jatyr. Al biz qoıylymdy sahnalaǵan M.Qurmanhanuly atyndaǵy mýzykalyq drama teatr óz aldyna bir úlken mektep. Alystaǵy aǵaıynnyń tirligine óte razy bolyp bara jatyrmyz», – dedi teatr akteri Baqytjan Tańatqanuly.

«Botaqara-Sheshenbıkeden» bólek, óner ujymy Joltaı Álmashulynyń «Muńmen alysqan adam» spektaklin kórermenge usyndy.