Qostanaılyq ánshi Abý-Dabıden júldeli oraldy
QOSTANAI. QazAqparat - Qarabalyqtyq jas vokalshy Samıra Berkimbaeva Birikken Arab Ámirlikteri astanasy Abý-Dabıde ótken ІІІ halyqaralyq ınstrýmentaldy baıqaýda júldeli 2-orynǵa ıe boldy, dep habarlaıdy QazAqparat.
Samıra Berkimbaeva jaqynda Kókshetaý qalasynda ótken «Balalarǵa beıbitshilik» atty halyqaralyq baıqaýdan jeńimpaz atanyp, Birikken Arab Ámirlikterine joldama alǵan edi. Al bul jolǵy baıqaýǵa álemniń ár túkpirinen tanymal solıster jáne orkestrler qatysty. Samıra osy dodada «Qazaqstanym» ánin beınebaıanymen usynǵan bolatyn. Bul án kompozıtor Halykbek Rızabekke tıesili bolsa, sózin aıtysker Aıtaqyn Bulǵaqov jazdy.
Án jazylymy jáne beınebaıan túsirilimimen Astana qalasynyń kásipqoılary aınalysqan. Samıranyń bas tálimgeri - aýdandyq Mádenıet úıiniń vokaldan sabaq beretin ustazy Indıra Arbabaevanyń aıtýynsha, qazylar alqasynda Ázerbaıjan, Túrkııa, BAÁ, Taıaý Shyǵys jáne Reseı elderiniń sheberleri otyrdy. Olar qarabalyqtyq balǵynnyń ónerine erekshe tánti bolǵan. Kishkentaı Samıranyń qýanyshy qoınyna syımaı júr: alǵash ret shetelge shyǵyp, tuńǵysh ret ushaqqa minip, teńizdi kórip, birinshi márte keń aýqymdy shyǵarmashylyq baıqaýyna qatysyp otyr. Aıtpaqshy, jol shyǵynyn baldyrǵannyń ata-anasy óz qaltasynan kóterdi.
«Bul Samıranyń alǵashqy jeńisi emes. Kóptegen respýblıkalyq án dodalarynda top jardy. Biz balamyzdyń óner jolynda ushtalýyna barynsha múmkindik jasaımyz. Skaıp arqyly oqýdyń zamanaýı ádistemesi qoljetimdi ekenin eskersek, Samıranyń jan-jaqty jetilýine jaǵdaı bar. Ekinshi beınebaıanynyń otandyq arnalarda jaryq kórgenin taǵatsyz tosýdamyz. Mindetti túrde jańa baıqaýlarǵa qatysamyz. Qyzymyzdyń talaı jetistikterge jeterine kámil senemiz, - dep qýanyshymen bólisti Samıranyń ata-anasy.
Aıta keteıik, jerlesimiz sheshýshi kezeńde tek fılıppındik ánshige ese jiberdi. Ol onysyn daıyndyqsyz, repıtıtsııasyz shyqqanynan kóredi. Áıtse de, 2-oryn - qur qol tarasqan kóptegen eldiń ókilderimen salystyrǵanda, jas aıyrmasyn esepke alǵanda, óte úlken jeńis.
