Qostanaılyq 25 polıtseı «Halyq alǵysy» medalimen marapattaldy

QOSTANAI. QazAqparat – Qostanaı oblysynyń polıtsııa Departamentinde Táýelsizdik kúnine arnalǵan saltanatty is-shara ótti. Onda 25 polıtseıge koronavırýspen kúresi úshin «Halyq alǵysy» medali tapsyryldy, dep habarlaıdy QazAqparat tilshisi.

Іs-shara Departamenttiń murajaıynda barlyq sanıtarlyq normalardy saqtaı otyryp uıymdastyryldy.

Oblystyń bas polıtseıi, general-maıor Beket Aımaǵambetov jeke quramdy Táýelsizdik kúnimen quttyqtap, merekeniń mańyzynatap ótti.

«Bul qazaqstandyqtar úshin basty mereke ekenin bilemiz. Jıyrma toǵyz jyl ishinde Qazaqstannyń qarqyndy áleýmettik-ekonomıkalyq jáne mádenı damýy Tuńǵysh Prezıdent Nursultan Nazarbaevtyń dana basshylyǵymen erekshelendi. Bizdiń elde adamzatqa eleýli qaýip tóndiretin pandemııamen kúres áli de jalǵasýda. Qazirgi jaǵdaıda polıtseıler medıtsına qyzmetkerlerimen birge aldyńǵy qatarda. Bizdiń jumysymyzǵa azamattarymyzdyń qaýipsizdigi ǵana emes, olardyń densaýlyǵy men amandyǵy da baılanysty»,- deıdi Beket Aımaǵambetov.

Saltanatty jıynda Departament basshylyǵy otstavkadaǵy podpolkovnık Batyrbek Nýrekınge «QR ІІO ardageri» medalin tabystady. Ardager Іshki ister organdarynda 32 jyldan astam qyzmet etti, 2005 jyly Arqalyq qalasy ІІB bólim bastyǵy qyzmetinen qurmetti demalysqa shyqty.

Pandemııamen kúrestegi jemisti eńbegi úshin Prezıdent Jarlyǵymen óńirdegi 25 polıtseı «Halyq alǵysy» medalimen marapattaldy. Olardyń arasynda Ákimshilik polıtsııa basqarmasynyń bastyǵy polkovnık Andreı Grıgorevskıı, oblystyq PD shtab bóliminiń bastyǵy podpolkovnık Abylaı Mekebaev, ýchaskelik maıor Erik Vaısov jáne Qostanaı qalasy PB aǵa ınspektory kapıtan Karına Bazarbaeva bar.

Polkovnık Andreı Grıgorevskıı oblysta koronavırýstyń taralýyn boldyrmaý jónindegi jedel shtabty, Abylaı Mekebaev karantın kezinde oblystaǵy ahýaldyq shtabty basqardy. Olardyń basshylyǵymen táýlik boıy sanıtarlyq jáne blokposttar jumys istedi.

Qyzmettik mindetterin adal atqarǵany, jumysta joǵary nátıjelerge qol jetkizgeni úshin ishki ister mınıstriniń buıryǵymen 50-den astam qostanaılyq polıtseıge marapat tapsyryldy. Olardyń arasynda «Quqyq tártibin qamtamasyz etýge qosqan úlesi úshin» medalimen PD tyldyq qamtamasyz etý bastyǵy podpolkovnık Rýslan Sársenbaev jáne Qostanaı qalasy polıtsııa basqarmasynyń ýchaskelik maıory Ashat Jaqsymbekovterdi atap ótýge bolady.

Sondaı-aq murajaıda Táýelsizdik kúnine arnalǵan arnaıy kórme usynyldy, onda eldiń qalyptasýynyń mańyzdy kezeńderimen tanysýǵa bolady.