Qostanaılyq «103» qyzmetkerleri eki balany otqa oranǵan úıden alyp shyqty
QOSTANAI. QazAqparat – Qostanaıda jeke sektorlardyń birinde órt bolyp, úıde 3 bala qalyp qoıǵan. Alaıda jedel járdem qyzmetkerleriniń arqasynda búldirshinder aman qaldy, dep habarlaıdy QazAqparat.
Oqıǵa 7 jeltoqsan kúni oblys ortalyǵyndaǵy Letýnov kóshesinde bolǵan. Saǵat 17:10 shamasynda Qostanaı qalasy №3 emhanasynyń shuǵyl medıtsınalyq kómek brıgadasy sol kóshede kele jatqan. Jedel járdem qyzmetiniń aldynan 9 jasar qyz shyqqan.
«Onyń ústinde kúrteshe ǵana boldy. Ápkesi men inisiniń janyp jatqan úıde qalyp qoıǵanyn aıtty. Biz birden oqıǵa ornyna attandyq», - deıdi feldsher Gúlnar Mustafına.
Órtenip jatqan úıge kelgen jedel járdem qyzmetiniń júrgizýshisi Bekejan Bektasov pen feldsher Gúlnar Mustafına oılanbastan qutqarý sharalaryn bastaǵan.Terezeni syndyrý arqyly, olar úı ishindegi 11 jáne 6 jasar balalardy syrtqa shyǵardy.
Osylaısha 3 balany ajaldan arashalap qalǵan abzal jandarǵa oblystyq TJD bastyǵy Talǵat Kákimov madaqtaý qaǵazyn tapsyrdy.
