Qostanaılyq turǵynnyń úıinen 3 myltyq, 200 oq-dári tabyldy
QOSTANAI. KAZINFORM – Qostanaı oblysynyń prokýratýrasy qarýdy saqtaý faktisi boıynsha Qostanaı qalasynyń turǵynyna qatysty qylmystyq isti aıyptaý aktisin bekitti.
Tergeý barysynda 2024 jyldyń jeltoqsanynda buryn sottalǵan azamat atys qarýy men oq-dárilerdi zańsyz satyp alyp, turǵylyqty jerinde saqtaǵany anyqtaldy.
Tintý kezinde onyń páterinen 3 ańshylyq atys qarýy tárkilendi, onyń bireýi kelte myltyqqa aınaldyrylǵan jáne 200 danadan astam patron, onyń ishinde «Parabellým» tapanshasy men «Kalashnıkova - AK-74» avtomatynan atýǵa arnalǵan patrondar bar.
- Osy fakti boıynsha Qylmystyq kodekstiń 287- baby 3-bóligi, ıaǵnı atys qarýy men oq-dárilerdi zańsyz satyp alý jáne saqtaý boıynsha sotqa deıingi tergeý bastaldy.
Tergeý nátıjeleri boıynsha qylmystyq is sotqa jiberildi, - dep jazdy baqylaýshy organnan.
Aıta keterligi, osyndaı quqyq buzýshylyqtardyń aldyn alý maqsatynda qarý men oq-dárilerdi satyp alý, berý, ótkizý, saqtaý, tasymaldaý nemese alyp júrý sharalaryna qylmystyq jaýaptylyq kózdelgen. Jazanyń maksımaldy merzimi - 10 jylǵa deıin bas bostandyǵynan aıyrý.
Bul rette, ol áreketterde ózge qylmys quramy bolmasa, qarý men oq-dárilerdi óz erkimen tapsyrǵan adam qylmystyq jaýaptylyqtan bosatylady. Qarýdy erikti túrde tapsyrý úshin kez kelgen polıtsııa bólimshesine habarlasý qajet.
Buǵan deıin Qostanaı oblysynda blogerge birneshe qylmys jasady degen kúdik keltirilip otyrǵany habarlanǵan.