Qostanaılyq oqýshy qyz halyqaralyq ekspedıtsııa quramynda Soltústik polıýske bardy

QOSTANAI. KAZINFORM – Qostanaıdaǵy Nazarbaev Zııatkerlik mektebiniń oqýshysy Lıdııa Osennıkova «Bilim muzjarǵyshy» halyqaralyq arktıkalyq ekspedıtsııasynan oraldy, dep habarlaıdy Kazinform tilshisi.

Arktıkaǵa saıahat «Rosatom» memlekettik korporatsııasynyń qoldaýymen uıymdastyryldy.
Bıylǵy jyly ekspedıtsııa álemniń 21 elinen 66 oqýshynyń basyn qosty. Qatysýshylar Mýrmanskiden «Jeńiske 50 jyl» atomdyq muzjarǵysh kememen jolǵa shyǵyp, Soltústik polıýske jetip, Frants-Iosıf jeri arhıpelagyna bardy.

NZM baspasóz qyzmeti túsindirgendeı, on kún boıy balalar Arktıka jaǵdaıynda ǵylymı tájirıbeler júrgizdi, atom energetıkasy, ekologııa jáne ǵarysh salasyndaǵy mamandardyń dáristerin tyńdady, Arktıkanyń klımaty men bıoalýantúrliligin zerttedi.

Olar sondaı-aq ıadrolyq muzjarǵyshtyń dızaıny men jumys isteý prıntsıpterimen tanysyp, jahandyq ekologııalyq problemalardy talqylaýǵa qatysyp, mádenı almasýmen aınalysty. 
Lıdııa Osennıkovanyń aıtýynsha, ekspedıtsııa ol úshin naǵyz jańalyq boldy.

– Soltústik polıýske barý jáne Arktıkany óz kózimmen kórý – keremet áser. Osy biregeı ekspedıtsııaǵa qatysý múmkindigine rızamyn. Bul tájirıbe meni ǵylymǵa degen qyzyǵýshylyǵymdy arttyryp, ári qaraı damýǵa shabyttandyrdy, – dedi boıjetken. 

«Bilim muzjarǵyshy» ekspedıtsııasy altynshy ret ótkizilip otyr. Onyń maqsaty – jaratylystaný ǵylymdaryn nasıhattaý, daryndy mektep oqýshylaryn qoldaý jáne olarǵa kásiptik baǵdar berýge kómektesý. Joba júzege asyrylǵan jyldar ishinde oǵan álemniń túkpir-túkpirinen 400-den astam mektep oqýshysy qatysty.

Aıta keteıik, qazaqstandyq oqýshylar halyqaralyq olımpıadada jeńiske jetti.